R. Madrid នឹងឡើងសង្វៀនជាមួយ Liverpool ក្នុងការទិញយកជម្រើសជាតិអង់គ្លេសម្នាក់នេះ

អេស្ប៉ាញ៖ យោងតាមសេចក្ដីរាយការណ៍គឺក្លិប Real Madrid នឹងតាមទិញយកខ្សែបម្រើ Jude Bellingham ខណៈដែល Liverpool ក៏ចាប់អារម្មណ៍ជម្រើសជាតិអង់គ្លេសរូបនេះដែរ។

Bellingham ត្រូវបានគេចាត់ទុកថាជាតារាវ័យក្មេងម្នាក់របស់ Borussia Dortmund ដោយគេនៅសល់កុងត្រាស្នាក់នៅទឹកដី Signal Iduna Park ចំនួន៣ឆ្នាំទៀតបន្ទាប់ពីផ្ទេរមក Birmingham មក Dortmund កាលឆ្នាំ២០២០។

Bellingham រកបាន១០គ្រាប់និងបញ្ជូនបាល់១៨គ្រាប់ក្នុងការបង្ហាញខ្លួន៩០ប្រកួតឲ្យ Dortmund ស្របពេលបើគិតពីការលេងនៅជម្រើសជាតិអង់គ្លេសវិញគឺគេបង្ហាញខ្លួនបាន១៥ប្រកួត។

សារព័ត៌មាន Marca បានបង្ហើបថា Real Madrid បានកំណត់គោលដៅហើយថានឹងទិញយកគេប៉ុន្តែខាង Borussia Dortmund នឹងមិនលក់កីឡាករវ័យ១៩ឆ្នាំនាពេលនេះទេគឺអាចនឹងគិតគូលក់នៅឆ្នាំ២០២៣។

សារព័ត៌មាន BILD វិញបានចុះផ្សាយថា តម្លៃខ្លួនរបស់ Jude Bellingham អាចនឹងដល់១២០លានដុល្លារ៕

ប្រភព៖ sportskeeda