អីយ៉ាស់! លេចឮថា Spurs ត្រៀមយកអតីតកីឡាករខ្លួនរូបនេះពី R.Madrid ទៅរួមក្រុមវិញ

បរទេស៖ ក្លិប​ Tottenham Spurs ត្រូវបានគេរាយការណ៍ថា ចង់បានខ្សែបម្រើ Luka Modric ពី Real Madrid ទៅរួមក្រុមវិញ។

ជាការពិតណាស់ Modric ធ្លាប់ជាកីឡាកររបស់ក្រុម Spurs មួយរូបដែរ ក្នុងកំឡុងឆ្នាំ ២០០៨-២០១២ មុននឹងគេផ្លាស់មក R.Madrid​ នៅខែសីហា ឆ្នាំ ២០១២ ដដែលនេះ។ បច្ចុប្បន្នទោះមានវ័យរៀងជ្រេក្តី ក៏ Modric នៅតែបង្ហាញទម្រង់លេងបានយ៉ាងល្អដោយរដូវកាលនេះ គេបង្ហាញខ្លួនបាន ២០ប្រកួត និង បញ្ជូនបាល់ឲ្យមិត្តរួមក្រុម បាន ៥ដងហើយ។

បើយោងតាមអ្នកកាសែត លោក Ekrem Konur បានចុះផ្សាយថា Spurs ទំនងជាបញ្ចុះបញ្ចូលឲ្យ​​ Modric ត្រលប់មកលេងនៅទឹកដីអង់គ្លេសវិញ ប្រសិនបើគេមិនបន្តកុងត្រាជាមួយ R.Madrid​ នៅចុងខែ មិថុនាខាងមុខនេះ៕

ប្រភព៖ sportsmole