អង់គ្លេស៖ ក្លិបសារិកាព្រៃ Newcastle United បានយល់ព្រមតម្លៃជាមួយក្លិប Lyon ហើយ ជុំវិញការផ្ទេរយកខ្សែបម្រើកំពុងឡើងកូដ Bruno Guimaraes ក្នុងទំហំទឹកប្រាក់ ៣០លានផោន (ឬប្រមាណ ៤០លានដុល្លារ)។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
ជាមួយគ្នានេះ បើតាមការបញ្ជាក់របស់កាសែត Skysports ខ្សែបម្រើសញ្ជាតិប្រេស៊ីលខាងលើ នឹងធ្វើតេស្តសុខភាពនៅថ្ងៃពុធសប្ដាហ៍ក្រោយ។ ប៉ុន្តែយ៉ាងណាមិញ ក្លិប Lyon បានចេញសេចក្ដីថ្លែងការណ៍ ច្រានចោលពីការឈានដល់កិច្ចព្រមព្រៀង។
ក្លិប Lyon បានសរសេរយ៉ាងដូច្នេះថា៖
ក្លិប Olympique Lyonnais សុំបដិសេធយ៉ាងដាច់អហង្ការចំពោះព័ត៌មានមិនពិតដែលត្រូវបានផ្សព្វផ្សាយដោយប្រព័ន្ធផ្សព្វផ្សាយជាច្រើនដែលរាយការណ៍ពីកិច្ចព្រមព្រៀងរវាង Newcastle និង OL ក្នុងការផ្ទេរខ្សែបម្រើសញ្ជាតិប្រេស៊ីល Bruno Guimaraes ។ នៅក្នុងកំឡុងពេលទីផ្សារដោះដូរបែបនេះ តែងតែមានចេញព័ត៌មានចចាមអារ៉ាមជាញឹកញាប់។ ប៉ុន្តែក្លិប Lyon សុំក្រើនរំលឹកថា មានតែព័ត៌មានដែលចេញជាផ្លូវការដោយក្លិបប៉ុណ្ណោះ ដែលអាចយកមកពិចារណាបាន។
ទោះជាយ៉ាងណាក៏ដោយ នេះមិនមែនជាលើកទី១ទេ ដែល Lyon ចេញសេចក្ដីថ្លែងការណ៍ បដិសេធ ដូចខាងលើនេះ ពោលកាលពីឆ្នាំ២០១៩ Lyon បានចេញមកបដិសេធ ជុំវិញព័ត៌មានឈានដល់កិច្ចព្រមព្រៀងលក់ខ្សែការពារស្លាបឆ្វេង Ferland Mendy ទៅឲ្យ Real Madrid ។ ប៉ុន្តែរំលងបានតែ៨ថ្ងៃក្រោយមក Mendy ពិតជាបានផ្លាស់ទៅចូលរួមជាមួយក្លិបរហស្សនាម អធិរាជសពិតមែន៕
ប្រភព៖ skysports
Bong I.T