ភ្នំពេញ៖ គ្រឹះស្ថានអប់រំដែលមានទីតាំងនៅចក្រភពអង់គ្លេស កំពុងផ្តល់អាហារូបករណ៍ដល់គ្រួសារកម្ពុជា។ សាលាអន្តរជាតិ Shrewsbury International School Phnom Penh កំពុងដាក់ឱ្យដំណើរការកម្មវិធីអាហារូបករណ៍ Shrewsbury Gifted Children Scholarship Program ដែលមានតម្លៃសរុបចំនួន 500,000 ដុល្លារអាមេរិក ដល់សិស្សកម្ពុជា តាមរយៈការប្រឡងធ្វើតេស្តសមត្ថភាព IQ ដែលនឹងធ្វើឡើងនៅថ្ងៃទី 4 ដល់ថ្ងៃទី 5 ខែមិថុនា ឆ្នាំ 2022។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
សាលាអន្តរជាតិ Shrewsbury International School Phnom Penh នឹងក្លាយទៅជាសាលាដំបូងគេក្នុងព្រះរាជាណាចក្រកម្ពុជា ដែលមានបរិក្ខារទំនើបទាន់សម័យបំផុត ដែលស្របតាមកម្មវិធីអប់រំរបស់សាលា Shrewsbury នៅក្នុងចក្រភពអង់គ្លេស ក្នុងការផ្តល់ការអប់រំដ៏ពេញលេញមួយទៅកាន់អ្នកសិក្សាវ័យក្មេង ជាមួយនឹងកម្មវិធីសិក្សា និងសកម្មភាពក្រៅសាលាដ៏ល្អបំផុត។
អាហារូបករណ៍នឹងត្រូវបានដាក់ឱ្យដំណើរការតាមរយៈការធ្វើតេស្តសមត្ថភាព IQ ដែលត្រូវបានទទួលស្គាល់ជាអន្តរជាតិ រួមជាមួយនូវរបាយការណ៍ផ្លូវការផងដែរ។ ជាផ្នែកមួយនៃកម្មវិធី ការធ្វើតេស្តសមត្ថភាព IQ ដែលមានតម្លៃ 600 ដុល្លារនេះ នឹងមិនត្រូវបានគិតថ្លៃទេ។ ដើម្បីធានាបាននូវភាពត្រឹមត្រូវនៃការធ្វើតេស្តនេះ ភាគីទីបីដែលមានជំនាញវិជ្ជាជីវៈមួយឈ្មោះថា Tutor Impact នឹងចូលរួមជាមួយសាលាអន្តរជាតិ Shrewsbury International School Phnom Penh ដើម្បីធ្វើតេស្ត IQ ដល់សិស្សដែលចាប់អារម្មណ៍។
Tutor Impact គឺជាក្រុមអ្នកផ្តល់ការអប់រំអន្តរជាតិស្ថិតនៅក្នុងទីក្រុង Oxford ចក្រភពអង់គ្លេស ដែលធ្វើការជ្រើសរើសគ្រូបង្រៀនពីសាកលវិទ្យាល័យកំពូលទាំង 10 របស់ចក្រភពអង់គ្លេស រួមទាំង Oxford និង Cambridge។ ពួកគេផ្តល់ការបណ្តុះបណ្តាលជំនាញទន់ ការធ្វើតេស្តតក្កវិទ្យាទៅដល់សិស្សនុសិស្សចាប់ពីកម្រិតមត្តេយ្យរហូតដល់វិទ្យាល័យក្នុងប្រទេសចំនួន 10 ផ្សេងៗគ្នា ក៏ដូចជាការផ្តល់សេវាកម្មចុះឈ្មោះចូលរៀននៅសាកលវិទ្យាល័យឈានមុខគេក្នុងចក្រភពអង់គ្លេស។
លោក Charles Wong សហស្ថាបនិក និងជានាយកប្រតិបត្តិនៃសាលាអន្តរជាតិ Shrewsbury International School Phnom Penh បានមានប្រសាសន៍ថា៖
« កុមារជាដែលប្រកបដោយទេព្យកោសល្យជាច្រើននាក់ មិនអាចទទួលបានលទ្ធផលល្អនៅក្នុងការបំពេញកិច្ចការរបស់ពួកគេ ដោយសារតែពួកគេមិនស្គាល់ពីសក្តានុពលរបស់ខ្លួន។ ហេតុដូច្ចេះហើយ យើងសូមលើកទឹកចិត្តដល់មាតាបិតាក្នុងការអនុញ្ញាត និងនាំកូនៗទៅចូលរួមធ្វើតេស្ត IQ ប្រកបដោយវិជ្ជាជីវៈនេះ ដើម្បីឲ្យពួកគេអាចកំណត់អត្តសញ្ញាណឱ្យបានច្បាស់លាស់ និងបង្កើនបញ្ញារបស់ពួកគេ។ ការធ្វើតេស្ត IQ នេះមានចំនួនកំណត់ ហេតុដូច្នេះហើយ ឪពុកម្តាយដែលទំនាក់ទំនងមកយើងបានមុននឹងទទួលបានឱកាសកាន់តែខ្ពស់ ដែលកូនៗរបស់ពួកគេនឹងទទួលបានការធ្វើតេស្ត IQ នេះ »។
លោកបានបន្តថា៖
« នេះជាឱកាសដ៏ល្អប្រសើរមួយដែលសាលារបស់យើងបានផ្តល់ជូនដល់សិស្សានុសិស្ស តាមរយៈការអនុវត្តតាមសាលា Shrewsbury នៅចក្រភពអង់គ្លេស ដែលល្បីទៅលើការប្រើប្រាស់បរិក្ខាសិក្សាទំនើបនិងល្អបំផុតរបស់ប្រព័ន្ធអប់រំអង់គ្លេស ដែលពេលនេះមាននៅក្នុងប្រទេសកម្ពុជាហើយ »។
កុមារអាយុចន្លោះពី 4 ទៅ 11 ឆ្នាំមានសិទ្ធិទទួលបានការធ្វើតេស្ត IQ នេះ ហើយពួកគេនឹងត្រូវបែងចែកទៅតាមលក្ខខណ្ឌនីមួយៗ រួមមាន៖ ឆ្នាំដំបូង (Early Years) គឺជាក្រុមកុមារដែលមានអាយុពី 2 ទៅ 5 ឆ្នាំ; ដំណាក់កាលសំខាន់ទី 1 (Key Stage 1) មានអាយុពី 5 ទៅ 7 ឆ្នាំ; និងដំណាក់កាលសំខាន់ទី 2 (Key Stage 2)មានអាយុពី 7 ទៅ 11 ឆ្នាំ។ ពិន្ទុ IQ ពី 130 ឬខ្ពស់ជាងនេះ ត្រូវបានចាត់ទុកថាជាកម្រិតប្រកបដោយទេពកោសល្យខ្ពស់ (Gifted level) ខណៈអ្នកដែលមានពិន្ទុ IQ ពី 120-129 គឺនៅកម្រិតឧត្តម(Superior level)។
អាហារូបករណ៍សរុបចំនួន 9កន្លែង នឹងត្រូវបានផ្តល់ទៅសិស្ស ហើយ ក្រុមអាយុនីមួយៗ ទទួលបានអាហារូបករណ៍ចំនួន៣កន្លែង ទៅតាមលទ្ធផលតេស្តដែលពួកគេទទួលបាន និងឃ្លីបវីដេអូរយៈពេល 30 វិនាទីដែលពន្យល់ពីមូលហេតុដែលពួកគេចង់សិក្សានៅសាលាអន្តរជាតិ Shrewsbury International School Phnom Penh ព្រមទាំងការឆ្លើយតបទៅនឹងលក្ខខណ្ឌវិនិច្ឆ័យផ្សេងៗទៀត។
អាណាព្យាបាលដែលមានចំណាប់អារម្មណ៍ចង់ទទួលបានព័ត៌មានលម្អិតបន្ថែមទាក់ទងនឹងកម្មវិធីអាហារូបករណ៍ អាចទាក់ទងដោយផ្ទាល់ទៅសាលាអន្តរជាតិ Shrewsbury International School Phnom Penh ដែលមានទីតាំងនៅ Flatiron by Meridian អគារភ្នំពេញស៊ីធីសេនធ័រ៕
អំពីសាលាអន្តរជាតិ Shrewsbury International School Phnom Penh
សាលាអន្តរជាតិ Shrewsbury International School Phnom Penh ដែលជាសាលាផ្តល់ទាំងការស្នាក់នៅ និងអាហារដល់សិស្សដំបូងគេក្នុងប្រទេសកម្ពុជា គឺជាសាលាអន្តរជាតិផ្តល់ការអប់រំដ៏ទំនើបសម្រាប់ទាំងក្មេងប្រុស និងក្មេងស្រី។ អនុវត្តតាមកម្មវិធីសិក្សារបស់សាលាអន្តរជាតិ Shrewsbury សាលាអន្តរជាតិ Shrewsbury International School Phnom Penh ផ្តល់ការអប់រំ សកម្មភាពក្រៅសាលាដែលល្អបំផុត រួមជាមួយនឹងថ្នាក់រៀន ថ្នាក់ល្ខោន ថ្នាក់តន្ត្រី កន្លែងស្នាក់នៅ និងបរិក្ខារដ៏ទំនើប។
Bong I.T