សញ្ញាបណ្ណ ABA បានទូទាត់ទឹកប្រាក់ដោយជោគជ័យ ដែលបញ្ជាក់ពីភាពរឹងមាំរបស់ធនាគារ!

ភ្នំពេញ៖ ធនាគារ ABA ដែលជាធនាគារពាណិជ្ជលេខមួយនៅកម្ពុជា បានទូទាត់ទាំងប្រាក់ដើម និងការប្រាក់ សម្រាប់ឆ្នាំចុងក្រោយនៃ សញ្ញាបណ្ណសាជីវកម្ម របស់ខ្លួន (សញ្ញាប័ណ្ណ  ABA) ជូនវិនិយោគិន កាលពីថ្ងៃ ទី12 ខែសីហា ឆ្នាំ2022។

​គួរបញ្ជាក់ផងដែរថា កាលពីខែសីហា ឆ្នាំ2019 ធនាគារបានបោះផ្សាយសញ្ញាប័ណ្ណ ABA ក្នុងទំហំទឹកប្រាក់សរុប​ចំនួន​ 84.821​ ពាន់​លាន​រៀល​ (​ប្រមាណ 21​ លាន​ដុល្លារ​អា​មេ​រិ​ក​) ​ ជាមួយនឹង​ការ​ផ្សាយ​លក់​ក្នុង​តម្លៃ​ 100,000​ រៀល ក្នុងមួយឯកតាសញ្ញាបណ្ណសាជីវកម្ម និងមានឥណប្រតិទានរយៈពេល 3 ឆ្នាំ។ អត្រា​គូ​ប៉ុង​គឺ ​ 7.75%​ ក្នុង​មួយ​ឆ្នាំ​ ជាមួយ​ការ​ទូទាត់​រៀង​រាល់​ឆមាស​។ ក្នុងរយៈពេល 3 ​ឆ្នាំ ABA បានទូទាត់ការប្រាក់សរុបចំនួន 19.69 ពាន់លានរៀលជូនដល់វិនិយោគិន។

សញ្ញាបណ្ណ ABA បានក្លាយជាសញ្ញាប័ណ្ណសាជីវកម្មដំបូងគេ ដែលផ្ដល់ជូនទាំងវិនិយោគិនស្ថាប័ន និងរូបវន្ដបុគ្គល។ សញ្ញាបណ្ណនេះក៏ជាមូលបត្របំណុលលើកដំបូង ដែលផ្ដល់ជូនដោយធនាគារពាណិជ្ជនៅក្នុងប្រទេស ហើយជាសញ្ញាបណ្ណកម្ពុជាដំបូងគេ ដែលទទួលបានចំណាត់ថ្នាក់លទ្ធភាពសងកម្រិត “B” ពីភ្នាក់ងារវាយតម្លៃ S&P Global។

ក្នុងចំណោះវិនិយោគិនទាំងអស់ វិនិយោគិនភាគច្រើនគឺជារូបវន្ដបុគ្គល និងជាប្រជាជនកម្ពុជា។​ នេះបានបង្ហាញពីទំនុកចិត្តរបស់ប្រជាជនចំពោះរូបិយប័ណ្ណជាតិ និងបង្ហាញអំពីឆន្ទៈរបស់ពួកគាត់ក្នុងការវិនិយោគប្រាក់រៀល។  សញ្ញាបណ្ណ ABA បានរួមចំណែកដល់ការអភិវឌ្ឍទីផ្សារមូលធនកម្ពុជា ធ្វើឲ្យវិស័យនេះកាន់តែទទួលបានទំនុកចិត្តពីបណ្ដាវិនិយោគិនទាំងស្ថាប័ន និងរូបវន្ដបុគ្គល​។

ក្នុងឆ្នាំ2022 ABA បន្ដពង្រឹងជំហររបស់ខ្លួនក្នុងទីផ្សារ​យ៉ាងរឹងមាំ និងនៅតែរក្សាដំណែងជាធនាគារពាណិជ្ជក្នុងស្រុកធំបំផុត ដោយគិតលើទ្រព្យសកម្ម, ប្រាក់បញ្ញើ, កម្ចីដុល, និងប្រាក់ចំណេញសុទ្ធ ចាប់តាំងពីឆ្នាំ2021 មក។ ​

ជាក់ស្ដែងទ្រព្យសកម្មសរុបរបស់ ABA សម្រេចឈានដល់ 8.5 ប៊ីលានដុល្លារអាមេរិក ខណៈផលបត្រប្រាក់បញ្ញើកើនឡើងដល់ 6.9 ប៊ីលានដុល្លារអាមេរិក គិតត្រឹមចុង ត្រីមាសទី 2។ ធនាគារទទួលបានប្រាក់ចំណេញសុទ្ធ 130.6 លានដុល្លារអាមេរិក សម្រាប់រយៈពេល 6 ខែ នៃឆ្នាំ2022។

សូមស្វែងរករបាយការណ៍ហិរញ្ញវត្ថុដែលបានធ្វើសវនកម្មរួចសម្រាប់ 6 ខែចុងក្រោយ​ ទីនេះ៕