ភ្នំពេញ៖ អ្នកចម្រៀងអូប៉េរ៉ាកម្ពុជា លោក ឃួន សិទ្ធិស័ក្ដិ និងសិល្បករល្បីល្បាញដទៃទៀត នឹងចូលរួមសម្ដែងល្ខោនអូប៉េរ៉ាអ៉ីតាលី «Madama Butterfly» នៅរោងមហោស្រពកោះពេជ្រក្នុងរាជធានីភ្នំពេញ នាខែធ្នូខាងមុខនេះ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សការសម្តែងនេះនឹងមានព្រះរាជដឹកនាំដោយ ព្រះអង្គម្ចាស់ ស៊ីសុវត្ថិ រ៉ាវីវឌ្ឍនា មុនីពង្ស ព្រមទាំងមានវត្តមានអ្នកចម្រៀងអូប៉េរ៉ាខ្មែរ លោក ឃួន សិទ្ធិស័ក្ដិ ផងដែរ។ លោក សិទ្ធិស័ក្ដិ នឹងរួមសហការជាមួយក្រុមសិល្បករអូប៉េរ៉ាអន្តរជាតិមកពីអ៉ីតាលី និងជប៉ុនដែលរួមមាន អ្នកនាង Yasuko Fuji អ្នកនាង Ai Iwasaki លោក Enrico Terrone Guerra និងសិល្បករ-សិល្បការិនី ច្រើនរូបទៀត។
ការសម្ដែងល្ខោនអូប៉េរ៉ារឿង «Madama Butterfly» នៅប្រទេសកម្ពុជានឹងមានអ្នកសម្តែងជាង ៧០ នាក់ រួមទាំងក្រុមភ្លេង និងក្រុមចម្រៀង។ សម្រាប់ការសម្តែងនេះនឹងត្រូវបានដឹកនាំដោយផលិតករជនជាតិអ៉ីតាលី លោក Vincenzo Grisostomi Travaglini និង ព្រះអង្គម្ចាស់ ស៊ីសុវត្ថិ រ៉ាវីវឌ្ឍនា មុនីពង្ស។
លោក Gabriele Faja នាយកគ្រប់គ្រងផ្នែកផលិតកម្មវិធី បានមានប្រសាសន៍ថា៖
«ចំពោះការនាំយកល្ខោនអូប៉េរ៉ាមកប្រទេសកម្ពុជា យើងរំពឹងថានឹងបានបង្ហាញនូវទេពកោសល្យផ្នែកសិល្បៈ និងវប្បធម៌ខ្មែរ។ យើងបានមើលឃើញនូវសមត្ថភាពរបស់អត្ដពលិក និងការរៀបចំព្រឹត្ដិការណ៍កីឡាស៊ីហ្គេមរបស់កម្ពុជារួចហើយ។ តាមរយៈព្រឹត្តការណ៍ស៊ីហ្គេមនេះបានឱ្យយើងស្គាល់នូវវប្បធម៌ដ៏សម្បូរបែបរបស់ប្រទេសកម្ពុជា។ ទន្ទឹមនឹងនេះចំពោះការសម្ដែងរួមគ្នារវាងសិល្បករកម្ពុជា និងអន្ដរជាតិលើឆាកសម្ដែងអូប៉េរ៉ាដ៏ធំនេះ យើងក៏មានបំណងបង្ហាញមហាជនគ្រប់រូបបានឃើញថា ប្រទេសកម្ពុជាមានទម្រង់សិល្បៈជាច្រើនទៀត»។
ល្ខោនអូប៉េរ៉ា នឹងក្លាយជាការសម្ដែងមួយដើម្បីអបអរសាទរខួបលើកទី៧០ នៃទំនាក់ទំនងការទូតជប៉ុន-កម្ពុជា ហើយការសម្តែងនេះបច្ចុប្បន្នក៏កំពុងស្វែងរកការឧបត្ថម្ភបន្ថែមពីការគាំទ្រពីសំណាក់ដៃគូមួយចំនួនរួចទៅហើយ រួមមាន ស្ថានទូតអ៉ីតាលីប្រចាំប្រទេសថៃ មជ្ឈមណ្ឌលសន្និបាត និងពិព័រណ៍កោះពេជ្រ សាលាតន្ត្រី Soundskool ហាង Piano Shop Cambodia គណៈកម្មាធិការសិល្បៈ ICBA និងនាយកផ្នែកឌីហ្សាញ Juveris Tenisons។
មហាជនអាចរកជាវសំបុត្របានចាប់ពីខែសីហា ឆ្នាំ២០២៣ តាមរយៈកម្មវិធី Last2Ticket ដើម្បីទទួលយកនូវបទពិសោធន៍កម្មវិធីវប្បធម៌ដ៏អស្ចារ្យនេះ។
ដើម្បីចូលរួមក្នុងកម្មវិធីដ៏ពិសេសនេះ សូមទាក់ទងលោក Gabriele Faja តាមរយៈអ៉ីម៉ែល៖ [email protected]។
Bong I.T