អីយ៉ាស់! Bayern កំពុងឆ្មក់ឱកាសចង់បានតារាឆ្នើមរូបនេះ បន្ទាប់ពីឮថាគេកំពុងមិនសប្បាយចិត្តនៅ Man UTD

បរទេស៖ ក្លិបយក្ស Bayern Munich ត្រូវបានគេរាយការណ៍ថា កំពុងពិចារណាចង់បានខ្សែការពារកណ្តាល Raphael Varane បន្ទាប់ពីមានដំណឹងលេចឮថា រូបគេកំពុងមានអារម្មណ៍មិនសប្បាយចិត្តនឹងស្ថានភាពរបស់ Manchester United បច្ចុប្បន្ន។

ជាការពិតណាស់ នាមួយរយៈចុងក្រោយនេះ Varane គឺមិនសូវស្ថិតនៅក្នុងជម្រើស ១១ នាក់ដំបូងរបស់អ្នកចាត់ការលោក Erik ten Hag នោះទេ ដោយភាគច្រើនបុរសសញ្ជាតិ ហូឡង់ គឺចូលចិត្តប្រើ Harry Maguire ឬ Jonny Evans ក្នុងឈុតដំបូងជំនួសវិញ។

យោងតាមការចុះផ្សាយដោយកាសែត Sky Sport Germany បានឱ្យដឹងថា Bayern ឥឡូវនេះកំពុងតែសិក្សាអំពីលទ្ធភាពក្នុងការចុះកុងត្រាយកខ្សែការពារវ័យ ៣០ ឆ្នាំខាងលើ។ ប្រភពដដែលបានបន្ថែមថា នៅក្នុងទីផ្សារដោះដូររដូវរងារនាខែ មករា ខាងមុខ Varane អាចនឹងមានតម្លៃចន្លោះពី ២០ លានអឺរ៉ ឬប្រមាណជា (២២ លានដុល្លារអាមេរិក) ទៅ ៣០ លានអឺរ៉ូ ឬប្រមាណជា (៣២.៨ លានដុល្លារអាមេរិក)។

ប្រភព៖ Metro