តារាឆ្នើមរូបនេះ ត្រូវគេសង្ស័យថាអាចនឹងចាកចេញពី Liverpool ក្រោយសុខៗគេបានលុបរូបជាមួយ LFC នៅលើ Ig អស់គ្មានសល់

បរទេស៖ ខ្សែប្រយុទ្ធ Darwin Nunez ត្រូវគេដាក់ការសង្ស័យថា អាចនឹងចាកចេញពី Liverpool នៅដំណាច់រដូវកាលនេះ បន្ទាប់ពីរូបគេបានលុបរូបខ្លួនឯងជាមួយក្លិបហង្សក្រហមចោលទាំងអស់ កាលពីល្ងាចថ្ងៃ អាទិត្យ ទី ៥ ខែ ឧសភា ម្សិលមិញនេះ។

ជាការពិតណាស់ ខ្សែប្រយុទ្ធសញ្ជាតិ អ៊ុយរុហ្គាយ វ័យ ២៤ ឆ្នាំរូបនេះ ត្រូវបាន Liverpool ទិញយកមកពីក្រុម ព័រទុយហ្គាល់ Benfica កាលពីខែ មិថុនា ឆ្នាំ ២០២២ កន្លងទៅក្នុងតម្លៃ ៨៥ លានផោន ឬប្រមាណជា (១០៦ លានដុល្លារអាមេរិក)។

ទោះបីយ៉ាងណាក៏ដោយ ក្នុងរដូវកាលដំបូងនេះ Nunez ហាក់ពុំសូវសមប្រកបប៉ុន្មាននោះទេ ដោយរូបគេតែងតែទទួលបាននូវពាក្យរិះគន់ជារឿយៗពីសំណាក់អ្នកគាំទ្រ និងអតីតកីឡាករជើងចាស់ ខណៈក្នុងការបង្ហាញខ្លួនកន្លងមក រូបគេក៏រកបានគ្រាប់បាល់ស៊ុតបញ្ចូលទីបានចំនួន ១៨ គ្រាប់ផងដែរ។

ប៉ុន្តែនាការប្រកួត ២ ប្រកួតចុងក្រោយនេះ Nunez មិនអាចប្រជែងកៅអី ១១ នាក់ដំបូងបានឡើយ ហើយរូបគេបានលេងក្នុងនាមជាកីឡាករបម្រុងប៉ុណ្ណោះ ចំណែកក្នុងការប្រកួត ១១ ប្រកួតចុងក្រោយនេះ រូបគេរកបានគ្រាប់បាល់បានត្រឹមតែ ១ គ្រាប់ប៉ុណ្ណោះ ដូច្នេះហើយតាមរយៈស្ថិតមិនល្អបែបនេះ ក៏ដូចជាក្នុងពេលម្សិលមិញនេះ Nunez បានលុបរូបខ្លួនឯងជាមួយ Liverpool ចោល វាគឺបានធ្វើឱ្យអ្នកគ្រប់គ្នាសង្ស័យថា អតីតខ្សែប្រយុទ្ធរបស់ Benfica អាចនឹងចាកចេញពីទឹកដី Anfield នៅរដូវក្តៅនេះ៕

ប្រភព៖ Metro