កម្ពុជា សម្ពោធដាក់ឱ្យដំណើរការប្រព័ន្ធឌីជីថល សម្រាប់ចុះបញ្ជីសហគ្រាសធុនតូចនិងមធ្យម សិប្បកម្ម និងរោងចក្រ

ភ្នំពេញ៖ កម្ពុជា សម្ពោធដាក់ឱ្យ​ដំណើរ​ការប្រព័ន្ធឌីជីថល និងវិបផតថលសម្រាប់ការចុះបញ្ជី និងផ្តល់អាជ្ញាប័ណ្ណសម្រាប់សហគ្រាសធុនតូចនិងមធ្យម សិប្បកម្ម និងរោងចក្រ។

ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និង​នវានុវត្តន៍ ក្រោមកិច្ចសហការ និងការគាំទ្រពីភាគីអូស្ត្រាលី បានដាក់ឱ្យដំណើរការប្រព័ន្ធឌីជីថលនេះ ដើម្បីជួយសម្រួល​ដល់ការចុះបញ្ជីអាជីវកម្ម​ដោយជំនួស​នីតិវិធីដែលធ្វើ​ដោយ​ដៃ កាត់បន្ថយតម្រូវការនៃការជួបអ្នកផ្តល់សេវា កាត់បន្ថយពេលវេលាស្នើសុំ និងសម្រួលការទូទាត់ប្រាក់។

ពិធីសម្ពោធដាក់ឱ្យប្រើប្រាស់ជាផ្លូវការនេះត្រូវបានធ្វើឡើងក្រោមអធិបតីភាព លោក អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ រួមជាមួយថ្នាក់ដឹកនាំរាជរដ្ឋាភិបាល និង​អង្គទូតនានាជាច្រើន ក្នុងឱកាសនៃការប្រារព្ធទិវាជាតិសហគ្រាសធុនមីក្រូ តូច និងមធ្យម លើកទី១។ ពិធីនេះ​ក៏មានការចូលរួមពីសហគ្រិន តំណាងសមាគមធុរកិច្ច ក្រសួង-ស្ថាប័ន និងដៃគូអភិវឌ្ឍន៍ជាច្រើនផងដែរ។

ក្នុងដំណាក់កាលទី១ ប្រព័ន្ធនេះផ្តល់សេវាសំខាន់ៗចំនួន ៣ គឺ៖ ១.-ការស្នើសុំប្រកាសបង្កើតសហគ្រាស​ធុនតូចនិងមធ្យម និងសិប្បកម្ម, ២.-ការស្នើសុំអាជ្ញាប័ណ្ណ/បន្តអាជ្ញាប័ណ្ណដំណើរការសហគ្រាសធុនតូចនិងមធ្យម និងសិប្បកម្ម, និង ៣.- ការស្នើសុំបង្កើតរោងចក្រ។ បន្ទាប់ពីការដាក់ឱ្យដំណើរការនេះ សហគ្រាសធុនតូចនិង​មធ្យម សិប្បកម្ម និងរោងចក្រ អាចដាក់ពាក្យស្នើសុំ ធ្វើការទូទាត់ប្រាក់ និងទទួលបានឯកសារសំខាន់ៗ​ទាំងនេះ​តាមអ៊ីនធឺណិតដោយផ្ទាល់។

ការសម្ពោធដាក់ឱ្យដំណើរការប្រព័ន្ធផ្តល់សេវាសាធារណៈឌីជីថលនេះ គឺជាវឌ្ឍនភាពដ៏សំខាន់ថ្មីមួយទៀត​នៅក្នុងដំណើររបស់យើងឆ្ពោះទៅការកសាងបរិយាកាសអាជីវកម្មដែលកាន់តែមានប្រសិទ្ធភាព និងតម្លាភាព។ ជាការលើកឡើង ហែម វណ្ណឌី រដ្ឋមន្ត្រីនៃក្រសួងឧស្សាហកម្ម វិទ្យាសាស្ត្រ បច្ចេកវិទ្យា និង​នវានុវត្តន៍។

លោក បានបន្តថា តាមរយៈការសម្រួលដំណើរការចុះបញ្ជី និងផ្តល់អាជ្ញាបណ្ណ យើងនឹងកាត់បន្ថយបន្ទុករដ្ឋបាលរបស់វិស័យឯកជន និងជំរុញបរិយាកាសធុរកិច្ចកាន់តែអំណោយផល។

លោក Andreas Zurbrugg ភារធារីនៃស្ថានទូតអូស្ត្រាលីប្រចាំកម្ពុជា បានថ្លែងថា ប្រព័ន្ធ​នេះគឺជាសក្ខីភាពមួយនៃកិច្ចខិតខំប្រឹងប្រែងរួមរបស់អូស្ត្រាលី និងកម្ពុជា។ ប្រព័ន្ធនេះនឹង​ជួយលុបបំបាត់បញ្ហារាំងស្ទះ ពង្រីកសក្តានុពលរបស់កម្ពុជាក្នុងវិស័យសហគ្រាសធុនតូចនិងមធ្យម និងសិប្បកម្ម និងឧស្សាហកម្ម និងរួមចំណែកដល់សេដ្ឋកិច្ចកម្ពុជាឱ្យកាន់តែមានភាពធន់ បរិយាប័ន្ន និងនិរន្តរភាព។ ជាការគូសបញ្ជាក់ ភារធារីដដែល។

គូសបញ្ជាក់ថា សហគ្រាសធុនតូច និងមធ្យមកម្ពុជាប្រមាណតែ ១៣% ប៉ុណ្ណោះដែលបានចុះបញ្ជីត្រឹមត្រូវ ប្រព័ន្ធនេះមាន​គោលបំណងបង្កើនការចុះបញ្ជីផ្លូវការ ដែលជួយឱ្យសហគ្រាសធុនតូច និងមធ្យមឱ្យពង្រីកលទ្ធភាព​ទទួលបាន​ហិរញ្ញប្បទាន ចូលក្នុងទីផ្សារ និងទទួលការគាំទ្រផ្សេងៗពីរាជរដ្ឋាភិបាល ព្រមទាំងលើកកម្ពស់ផលិតភាព ភាព​ប្រកួតប្រជែង និងការទាក់ទាញការវិនិយោគផ្ទាល់ពីបរទេស៕

ដោយ៖ មឿន ឌីណា (Moeun Dyna)