កម្ពុជា៖ ខ្សែប្រយុទ្ធក្រុមជម្រើសជាតិកម្ពុជា កីឡាករ Nick Taylor បានបង្ហោះសារយ៉ាងវែងអន្លាយសុំទោសមកកាន់អ្នកគាំទ្រកម្ពុជា បន្ទាប់ពីរូបគេមិនអាចជួយក្រុមឡើងទៅកាន់វគ្គជម្រុះចែកពូលនៃពានរង្វាន់ AFC Asian Cuo 2027។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
ជាការពិតណាស់ ក្នុងការប្រកួតជើងទីពីររវាង ក្រុមជម្រើសជាតិកម្ពុជា ទល់នឹង ក្រុមជម្រើសជាតិស្រីលង្កា កាលពីថ្ងៃអង្គារកន្លងទៅ បានអូសបន្លាយដល់វគ្គថែមម៉ោង និង វគ្គប៉េណាល់ទីកាត់សេចក្តី១១ម៉ែត្រ បន្ទាប់ពីក្រុមទាំងពីរបានបញ្ចប់ទៅដោយលទ្ធផលស្មើគ្នា ២ទល់នឹង២ ប៉ុន្តែ គួរឲ្យសោកស្តាយ យើងបរាជ័យក្នុងលទ្ធផល ២ទល់នឹង៤ ក្នុងការទាត់បាល់ប៉េណាល់ទី ធ្វើឲ្យក្រុមកម្ពុជាត្រូវហាលអាវត្រឹមវគ្គជម្រុះជុំទីមួយនៃពានរង្វាន់ AFC Asian Cup 2027។
យ៉ាងណាមិញ នៅព្រឹកនេះ Nick Taylor ដែលជាកីឡាករមួយរូបខកខានក្នុងការទាត់បាល់ប៉េណាល់ទី បានចេញមកសុំទោសអ្នកគាំទ្រកម្ពុជាយ៉ាងដូច្នេះថា៖
ជាដំបូង ខ្ញុំសូមអភ័យទោសចំពោះអ្នកគាំទ្រ និង មិត្តរួមក្រុមរបស់ខ្ញុំ។ ខ្ញុំដឹងថាការខកខានបាល់ប៉េណាល់ទីដំបូងធ្វើឱ្យអ្វីៗកាន់តែពិបាកសម្រាប់កីឡាកររបស់យើង។ ខ្ញុំសុំទទួលខុសត្រូវទាំងស្រុងដោយសារតែខ្ញុំមានអារម្មណ៍ជឿជាក់លើសមត្ថភាពរបស់ខ្ញុំ ប៉ុន្តែ ចុងក្រោយទទួលបានលទ្ធផលមិនសមប្រកប។ ខ្ញុំមិនចង់ឲ្យអ្នកណាអាណិតខ្ញុំទេ ខ្ញុំគ្រាន់តែចង់សុំទោស។ ខ្ញុំមានអារម្មណ៍ខកចិត្តដូចអ្នកដែរ។ យើងទាំងអស់គ្នាមានអារម្មណ៍ខកចិត្ត ទាំង កីឡាករ អ្នកគាំទ្រ ក្រុមការងារ។ យើងទាំងអស់គ្នាចង់ឈ្នះការប្រកួតនេះ ហើយយើងជឿថាយើងអាចធ្វើបាន។ វាពិតជាគួរឲ្យសោកស្ដាយក្នុងការទទួលបានលទ្ធផលដែលយើងកៀកនឹងទទួលបានជ័យជម្នះទៅហើយ។ មិនថាមានអ្វីកើតឡើងនាពេលនេះ និងទៅអនាគតទេ ខ្ញុំតែងតែមានមោទកភាពក្នុងការតំណាងឱ្យប្រទេសកម្ពុជា។ បាល់ទាត់ និងជីវិតនឹងបន្តដំណើរទៅមុខទៀត។ យើងសូមថ្លែងអំណរគុណយ៉ាងជ្រាលជ្រៅចំពោះអ្នកទាំងអស់គ្នាដែលគាំទ្រយើង ក្នុងគ្រាដ៏លំបាកនេះ៕
Bong I.T