ធ្វើការងារធ្ងន់ហើយ! ពេជ្រ សម្បត្តិ នឹងហោះទៅជប៉ុនលេងលក្ខណៈ 4 MEN ខណៈជុំដំបូងត្រូវជួបកីឡាករថៃ ដែលទើបឈ្នះ តៃមូ

បរទេស៖ ជាដំណឹងដ៏គួរឱ្យចាប់អារម្មណ៍ថ្មីមួយសម្រាប់អ្នកស្នេហាវិស័យកីឡាប្រដាល់គុនខ្មែរ ដោយកាលពីថ្ងៃទី ២១ ខែ វិច្ឆិកា ម្សិលមិញខាងសង្វៀន Knock Out របស់ ជប៉ុន បានប្រកាសអំពីបេក្ខភាពកីឡាករទាំង ៤ រូប ដែលត្រៀមប្រកួតលក្ខណៈ 4 Men នៅថ្ងៃទី ៣០ ខែ ធ្នូ ចុងឆ្នាំ ២០២៤ នេះ ហើយក្នុងនោះក៏មានវត្តមានតារាឆ្នើមរបស់កម្ពុជាកីឡាករក្របីព្រៃពេជ្រ សម្បត្តិ ផងដែរ។

យោងតាមការប្រកាសរបស់ខាងសង្វៀន Knock Out ផ្ទាល់តែម្តង កីឡាករទាំង ៤ រូប ដែលត្រៀមប្រកួតលក្ខណៈ 4 Men នៅខែក្រោយនេះរួមមានកីឡាករម្ចាស់ផ្ទះជប៉ុន Taimu Hisai, Kanato Shimoji, កីឡាករកម្ពុជា ពេជ្រ សម្បត្តិ និង កីឡាករថៃ Lom Ieesan។

ក្នុងនោះការប្រកួតក្នុងជុំដំបូង គឺ Taimu Hisai និងត្រូវជួបមិត្តរួមសញ្ជាតិ Kanato Shimoji រីឯពេជ្រ សម្បត្តិវិញ នឹងត្រូវជួបជាមួយកីឡាករ ថៃ Lom Ieesan។

Lom Ieesan នេះយើងក៏មិនអាចមើលរំលងពីសមត្ថភាពរបស់គេបានដែរ ដោយកាលពីថ្ងៃទី ២ ខែ វិច្ឆិកា កន្លងទៅ រូបគេទើបតែបានយកឈ្នះលើ Taimu Hisai នៅសង្វៀន Knock Out ហើយក្នុងនោះកីឡាករ ថៃ វ័យ ៣១ ឆ្នាំរូបនេះ គេធ្លាប់ប្រកួតបាន ៩៤ ដង ឈ្នះ ៦១ ដង(ផ្តួលដៃគូឱ្យសន្លប់ ១០ដង) ចាញ់ ៣១ ដង និងស្មើ ២ ដង។

គួរបញ្ជាក់ថា ក្រៅពី ពេជ្រ សម្បត្តិ ខាងកម្ពុជាយើងក៏មានកីឡាករម្នាក់ទៀតទៅចូលរួមផងដែរ នោះគឺកីឡាករ ចម្រើន គុនខ្មែរ ដោយរូបគេនឹងត្រូវជួបជាមួយកីឡាករ ជប៉ុន Ogasawara៕

ប្រភព៖ Knock Out