អ្នកជំនាញនៃក្រសួងវប្បធម៌ បញ្ចប់ការជួសជុលចេតិយស្នងការ​ចុងក្រោយ​នៃសាធារណរដ្ឋបារាំងប្រចាំនៅកម្ពុជា ក្នុងសម័យអាណានិគម

អ្នកជំនាញមកពីក្រសួងវប្បធម៌ និងវិចិត្រសិល្បៈបានបញ្ចប់ការជួស​ជុល ចេតិយដើម្បីឧទ្ទិសជូនលោក ហ្សង់ អ៊ែលដឺរេម៉ុង ស្នងការ​ចុងក្រោយនៃសាធារណរដ្ឋបារាំងប្រចាំនៅកម្ពុជា ​គឺមុន​សម័យ​កាលដែលប្រទេសកម្ពុជា​ទទួលឯករាជ្យត្រូវ​បានជួសជុលឡើងវិញ​ដូចទម្រង់ដើម។ចេតិយនេះបាន​សាងសង់នៅឆ្នាំ១៩៥១ នេះស្ថិតនៅ​ក្នុងបរិវេណនៃ​ក្រុមប្រឹក្សា​អភិវឌ្ឍន៍កម្ពុជា រាជធានីភ្នំពេញ ។

លើទំព័រហ្វេសប៊ុកផ្លូវការនៅថ្ងៃទី១៧ ខែធ្នូ ឆ្នាំ២០២៤ ក្រសួងវប្បធម៌ និងវិចិត្រសិល្បៈបានឱ្យដឹងថា អគ្គនាយកដ្ឋាន​បេតិកភណ្ឌ នៃក្រសួង​វប្បធម៌និងវិចិត្រសិល្បៈ បានសហការជាមួយក្រុមប្រឹក្សាអភិវឌ្ឍន៍កម្ពុជា ជួសជុល និងអភិរក្ស​ទម្រង់ដើមនៃចេតិយលោក ហ្សង់ អ៊ែលដឺរេម៉ុង។

ប្រវត្តិចេតិយនេះមានចំណាស់ជាង៧០ឆ្នាំ ពោលបានសាងសង់​ឡើងនៅឆ្នាំ ១៩៥១ក្នុងបរិវេណនៃក្រុមប្រឹក្សាអភិវឌ្ឍន៍​កម្ពុជា ដើម្បីឧទ្ទិសជូនលោក ហ្សង់ អ៊ែលដឺរេម៉ុង ស្នងការចុងក្រោយនៃ​សាធារណរដ្ឋបារាំងប្រចាំនៅកម្ពុជា គឺមុនសម័យ​កាលដែលប្រទេស​កម្ពុជា​ទទួលឯករាជ្យ។ការងារអភិរក្សនិងជួសជុលនេះ បានចាប់​ផ្តើមកាលពីខែកក្កដា ឆ្នាំ២០២៤ ហើយបានបញ្ចប់ក្នុងខែវិច្ឆិកាឆ្នាំ​ដដែល។ ការងារនេះ ជាទម្រង់មួយនៃកិច្ចការអភិរក្សចេតិយនា​សតវត្សរ៍ទី២០ ដែលបានកសាងឡើងក្នុងសម័យអាណា​ព្យាបាល​បារាំង។

លើការងារជួសជុលនេះ ក្រសួងវប្បធម៌បានពណ៌នាថា កិច្ចសហការ​លើការងារអភិរក្សនេះ គឺជាគម្រូមួយនៃកិច្ចសហការ​អន្តរក្រសួង និងស្ថាប័ន លើវិស័យសេដ្ឋកិច្ចនិងវប្បធម៌ ដែលកើតឡើងក្នុងបរិយា​កាសនៃកិច្ចប្រឹងប្រែងធ្វើឱ្យបេតិកភណ្ឌ​អាចរក្សាបានយូរអង្វែង៕

រូបថតៈក្រសួងវប្បធម៌ និងវិចិត្រសិល្បៈ