ចុម! Liverpool ពូកែបដិសេធពេក ឥឡូវ R.Madrid ប្រើក្បាច់ចុងក្រោយ ទៅចាក់ចូច Arnold ឱ្យធ្វើបែបនេះ

បរទេស៖ ក្លិបអធិរាជស Real Madrid ត្រូវបានគេរាយការណ៍ថា បានប្រាប់ទៅកាន់ Trent Alexander-Arnold ឱ្យធ្វើពុតជាកេចកុកដូច Kylian Mbappe និងបន្តបដិសេធរាល់សំណើកុងត្រាទាំងអស់របស់ Liverpool ដើម្បីអាចឱ្យគេមានឱកាសត្រូវក្រុមហង្សក្រហមដោះលែងមកកាន់ទឹកដី Bernabeu ដោយគ្មានតម្លៃខ្លួន។

ជាការពិតណាស់ កាលពីពេលថ្មីៗនេះមានសេចក្តីរាយការណ៍ថា Real Madrid បានដាក់សំណើទឹកប្រាក់ទៅ Liverpool ដើម្បីផ្ទេរយក Alexander-Arnold នៅទីផ្សារដោះដូរកីឡាករខែ មករា នេះចំនួន ២០ លានផោន ឬប្រមាណជា (២៥ លានដុល្លារអាមេរិក) ប៉ុន្តែចុងក្រោយសំណើនេះត្រូវបានបដិសេធភ្លាមៗដោយថ្នាក់លើរបស់ក្រុមហង្សក្រហម។

ដ្បិតកិច្ចសន្យារបស់ខ្សែការពារស្លាបស្តាំសញ្ជាតិ អង់គ្លេស វ័យ ២៦ ឆ្នាំនឹងផុតសុពលភាពនៅដំណាច់រដូវកាលនេះ ហើយគេអាចចាកចេញពីទឹកដី Anfield ដោយគ្មានតម្លៃខ្លួនក៏ដោយ ក៏ខាង Liverpool នៅតែចង់រក្សាគេទុក ហើយនឹងមិនលក់គេចេញនៅខែ មករា នេះទេ ដោយពួកគេនឹងព្យាយាមធ្វើយ៉ាងណា ដើម្បីបញ្ចុះបញ្ចូល Alexander-Arnold ឱ្យបន្តកុងត្រាថ្មីជាមួយពួកគេបន្តទៀត។

ងាកមកកាន់ក្លិបអធិរាជស Real Madrid វិញ ត្រូវបានគេដឹងថា ពួកគេគឺចង់បាន Alexander-Arnold ខ្លាំងមែនទែន ដោយសារតែបច្ចុប្បន្នពួកគេកំពុងមានបញ្ហានៅត្រង់តំបន់ខ្សែការពារស្លាបស្តាំ ខណៈថ្មីៗនេះសារព័ត៌មានអេស្ប៉ាញ Marca បានរាយការណ៍ថា ក្រុមម្ចាស់ជើងឯកពាន Champions League ១៥ សម័យមួយនេះបានប្រាប់ Arnold ឱ្យធ្វើដូច Mbappe កាលនៅ PSG ហើយត្រូវតែបដិសេធរាល់សំណើបន្តកុងត្រាថ្មីទាំងអស់របស់ Liverpool៕

ប្រភព៖ TEAM TALK