បទយកការណ៍៖ អ្នកលក់គោមផ្កាយខ្មែរកំពុងកាក់កបខ្លាំង នាឱកាសបុណ្យចូលឆ្នាំថ្មីប្រពៃណីជាតិខ្មែរ

ពិធីបុណ្យចូលឆ្នាំថ្មីប្រពៃណីជាតិខ្មែរ ជាបុណ្យដ៏ធំ និងបង្កប់នូវអត្ថន័យជ្រាលជ្រៅចំពោះពលរដ្ឋខ្មែរគ្រប់រូប មិនថានៅក្នុងស្រុកឬឯនាយសមុទ្រនោះទេតែងតែនាំគ្នាប្រារព្ធធ្វើមិនដែលអាក់ខានឡើយ។ក្នុងនោះដែរ គ្រប់ផ្ទះ វត្តអារាម ហាងលក់ដូរ ផ្សារទំនើប អគារការិយាល័យ ក្រុមហ៊ុន សហគ្រាសតូចធំ ស្ថាប័នរដ្ឋ ឯកជន រមែងបានរៀបចំតុបតែងតាំងលម្អសម្ភារៈបុណ្យចូលឆ្នាំខ្មែរ តាមទំនៀមទម្លាប់ប្រពៃណី មានដូចជា៖ គោមផ្កាយចម្រុះពណ៌ សម្រាប់ព្យួរ ក្រមា មួកស្លឹកត្នោត បំពង់ទឹកត្នោត កន្ទេលស្លឹកត្នោត ទូកត្នោត ស្មុគ ទ្រូ ឈ្នាង អង្រុត រទេះគោ និងប្រដាប់ប្រដាប្រើប្រាស់ប្រចាំថ្ងៃផ្សេងៗទៀតដែលជាអត្តសញ្ញាណខ្មែរ ខណៈដែលពិធីបុណ្យចូលឆ្នាំថ្មីប្រពៃណីជាតិខ្មែរកាន់តែខិតជិតមកដល់។ចំណែកអ្នកលក់គ្រឿងតុបតែងទាំងនោះវិញ ក៏កំពុងតែមមាញឹក និងការលក់សម្ភារៈទាំងនេះផងដែរ។

ពិធីបុណ្យចូលឆ្នាំថ្មីប្រពៃណីជាតិខ្មែរ ឆ្នាំម្សាញ់ ពុទ្ធសករាជ២៥៦៨ ឈានចូល សប្តស័ក ២៥៦៩ ដែលនឹងប្រព្រឹត្តទៅរយៈពេលបីថ្ងៃ ចាប់ពីថ្ងៃទី១៤ដល់ថ្ងៃទី១៦ ខែ មេសា ឆ្នាំ២០២៥។ នៅតាមបណ្តារាជធានីខេត្តទូទាំងប្រទេស បានប្រកាសអំពីការរៀបចំព្រឹត្តិការណ៍ សង្ក្រាន្ត ដោយមានការរៀបចំតុបតែងលម្អទទួលទេវតាឆ្នាំថ្មី។ក្នុងនោះដែរ គ្រប់ផ្ទះ វត្តអារាម ហាងលក់ដូរ ផ្សារទំនើប អគារការិយាល័យ ក្រុមហ៊ុន សហគ្រាសតូចធំ ស្ថាប័នរដ្ឋ ឯកជន រមែងបានរៀបចំតុបតែងតាំងលម្អសម្ភារៈបុណ្យចូលឆ្នាំខ្មែរ តាមទំនៀមទម្លាប់ប្រពៃណី មានដូចជា គោមផ្កាយចម្រុះពណ៌ សម្រាប់ព្យួរ ក្រមា មួកស្លឹកត្នោត បំពង់ទឹកត្នោត កន្ទេលស្លឹកត្នោត ទូកត្នោត ស្មុគ ទ្រូ ឈ្នាង អង្រុត ត្រក កញ្ជើ កញ្ច្រែង ល្អី ទាំងទំហំតូច ធំ រទេះគោ និងប្រដាប់ប្រដាប្រើប្រាស់ប្រចាំថ្ងៃផ្សេងៗទៀតដែលជាអត្តសញ្ញាណខ្មែរ។អ្នកស្រី សុខ ចំប៉ា និងស្វាមីម្ចាស់សិប្បកម្មលក្ខណៈគ្រួសារផលិតគោមផ្កាយខ្មែរធ្វើពីឫស្សី នៅខេត្តសៀមរាប ហាក់មមាញឹកខ្លាំងដើម្បីផលិតនូវគោមជាច្រើនឲ្យទាន់ពេលវេលាតាមការកម្មង់របស់អតិថិជន។មុខរបរតជំនាន់មួយនេះហាក់មិនមានការពិបាកអ្វីខ្លាំងសម្រាប់គ្រួសារអ្នកស្រីនោះទេ ព្រោះមានបទពិសោធន៍ច្រើនឆ្នាំ ម៉្យាងអ្នកស្រីតែងមានការកម្មង់ជាប្រចាំសម្រាប់គោមខ្មែរគ្រប់ខ្នាត និងទំហំតាមការពេញចិត្ត។បើតាមម្ចាស់សិប្បកម្មរូបនេះបានប្រាប់ឲ្យដឹងថាសម្រាប់បុណ្យចូលឆ្នាំថ្មី២០២៥នេះ គ្រួសារអ្នកស្រីពិតជារវល់ខ្លាំងដើម្បីផ្គត់ផ្គង់តាមការបញ្ជាទិញពីបណ្តាខេត្តផ្សេងៗនៅទូទាំងប្រទេស។ «ខ្ញុំឈ្មោះ សុខ ចំប៉ា ប្ដីរបស់ខ្ញុំឈ្មោះ សុខ សំអាតនិយាយពីថារឿងលក់គោមរបស់ខ្ញុំឆ្នាំនេះមានសន្ទុះច្រើនដោយសារបងប្អូនប្រជាពលរដ្ឋនៅតាមខេត្តនានាគាត់បានកម្មង់ច្រើនធ្វើឲ្យការលក់របស់ខ្ញុំខាងធ្វើគោមនេះដំណើរការបានប្រសើរ ហើយលក់ដាច់។គោមរបស់យើងធ្វើឡើងមានគ្រប់ខ្នាតមានចាប់ពីពីរតឹក(២០សង់ទីម៉ែត្រ) រហូតដល់ ពីរម៉ែត្រហើយសម្រាប់លម្អពេលចូលឆ្នាំខ្មែរយើងដើម្បីទទួលទេវតាឆ្នាំថ្មី ហើយភាគច្រើនគោមដែលគេទិញទៅភាគច្រើនជាអាជីវករដែលយកទៅលក់បន្តតាមបណ្តារាជធានីខេត្ត»។

ឆ្លងកាត់បទពិសោធន៍នៃការធ្វើគោមខ្មែរជាច្រើនឆ្នាំ គ្រួសារអ្នកស្រីបានចាប់របរធ្វើតែគោមខ្មែរតែប៉ុណ្ណោះ ហើយប្រើប្រាស់ផលិតផលក្នុងស្រុកដើម្បីផលិត។ «និយាយរួមទៅកន្លែងរបស់ប្អូនមានតែធ្វើគោមផ្កាយខ្មែរលក់តែប៉ុណ្ណោះ ដែលមានបិតក្រមា បិតក្រណាត់ធម្មតា បិតហូល ។បិទថង់ប្លាស្ទិកប្អូនអត់ធ្វើទេដោយសារពិបាកទុកដាក់។ដូច្នេះប្អូនធ្វើតែបីមុខតែប៉ុណ្ណោះ ហើយប្អូនអត់មានធ្វើអីក្រៅពីគោមនោះទេ។គោមរបស់យើងមានឆ្អឹងធ្វើពីដើមឫស្សី ហើយយើងមានខ្នាត មានពុម្ពត្រឹមត្រូវ ហើយមានគ្រប់ខ្នាត មានចាប់ពីពីរតឹករហូតដល់ពីរម៉ែត្រ មានបិតក្រមា បិទក្រណាត់ ធម្មតា ហើយនិងបិតហូល»។

សម្រាប់ការបញ្ជាទិញវិញអ្នកស្រីធ្វើសឹងតែមិនទាន់ផង ដោយឆ្នាំនេះវ៉ាដាច់ឆ្នាំមុនព្រោះអតិថិជនជួយកក់ និងទិញជាបន្តបន្ទាប់ឥតដាច់។ទោះយ៉ាងនេះក្តី អ្នកធ្វើគោមខ្មែរលក់រូបនេះនៅតែទទូចឲ្យបងប្អូនជួយគាំទ្រនូវផលិតផលប្រពៃណីមួយនេះឲ្យបានកាន់តែច្រើនថែមទៀត ព្រោះវាជារបស់ខ្មែរ ធ្វើដោយដៃកូនខ្មែរធ្វើយ៉ាងណាកុំឲ្យបាត់បង់។ «និយាយពីថា គោមដែលខ្ញុំលក់ឆ្នាំមុនប្រហែលជាងបីពាន់គោម។សន្ទុះឥឡូវនេះប្រហែលជាអាចចូលប្រាំពាន់គោម ឬក៏ជាងប្រាំពាន់ ដោយសារខ្ញុំលក់ដាច់តាំងពីដើមខែមួយមក។ឥឡូវនេះកំពុងតែធ្វើឆ្អឹងបណ្ដើរៗបន្ថែមទៀត។ខ្ញុំសំណូមពរឲ្យបងប្អូនប្រជាពលរដ្ឋខ្មែរយើងជួយគាំទ្រផលិតផលរបស់ខ្មែរយើងឲ្យច្រើនៗ ហើយប្រសិនបើបងប្អូនណាត្រូវការកម្មង់គោមផ្កាយយកទៅតុបតែងលម្អគេហដ្ឋាន ឬក៏សណ្ឋាគារ ប៊ូទីក ផ្ទះសំណាក់ អីបងអាចទាក់ទងមកលេខទូរសព្ទប្អូនបាន ០៨៧ ៩០ ២៤ ៥៤ មួយខ្សែទៀត ០៨៧ ៧៩ ៧៧ ៣២ នៅភូមិវត្តបូព៌សង្កាត់សាលាកំរើក ក្រុងសៀមរាប ផ្លូវលេខ ២៦។»ជួបជាមួយអ៊ំប្រុស ជុំ ប៊ុនលី វិញម្តង ដែលអ៊ំជាម្ចាស់សិប្បកម្មផលិត និងលក់គោមផ្កាយ គោមផ្ការំដួល ទង់ជាតិ ទង់សាសនា និងគ្រឿងតាំងលម្អផ្សេងៗ មានទីតាំងនៅមុខវត្តនិរោធរង្សី សង្កាត់និរោធ ខណ្ឌច្បារអំពៅ រាជធានីភ្នំពេញបានអះអាងថា៖ គោមផ្កាយ និងគ្រឿងតាំងលម្អផ្សេងៗសម្រាប់បុណ្យចូលឆ្នាំៗនេះហាក់ទទួលបានការគាំទ្រខ្លាំងពីអតិថិជន ពោលគឺសឹងតែផលិតមិនទាន់តម្រូវការ។

លោកជុំ ប៊ុនលី«អ្នកខេត្តគេកម្មង់យកតាមឡានអញ្ចឹង មួយមុខដប់គូ មួយមុខដប់គូអស់យកថែម អស់យកថែមយកទៅលក់បន្តលក់ដាច់បន្តតែម្ដង។អាខ្នាតប្រាំតឹកចុះក្រោមលក់ដាច់ខ្លាំង។យើងចាប់ផ្ដើមធ្វើផលិតទុកមុនខ្លះ បើយើងបិតគោមនឹងទុកតែម្តងទៅមិនដឹងថាគេយកមួយណា មិនទៀង។តាំងពីខែបី ចុងខែពីរអី យើងចេះតែធ្វើបន្តបន្ទាប់ទៀត នៅពេលដែលគេយកបានយើងបិទគោមនេះបន្តបន្ទាប់ទៀត។យើងចេះតែមានអតិថិជនជួយគាំទ្រចេះតែច្រើនទៅៗ ការធ្វើគោមក៏ចេះតែកើនឡើងៗទៅដែរ»។

ម្ចាស់សិប្បកម្មគោមផ្កាយរូបនេះបានបន្តថា ការតាំងលម្អគោមផ្កាយខ្មែរនាឱកាសបុណ្យចូលឆ្នាំថ្មីប្រពៃណីខ្មែរមានតាំងពីយូរយារណាស់មកហើយ។ហើយអ៊ំប្រុសចេះធ្វើគោមនេះតាំងពីនៅសម័យសង្គមរាស្រ្តនិយមមកម្ល៉េះ។តាមការកត់សម្គាល់ប្រជាជនខ្មែរនៅតែបន្តថែរក្សាមរតកដូនតាមួយនេះមិនឲ្យបាត់បង់ឡើយ។ «អបអរសាទរបុណ្យចូលឆ្នាំថ្មីប្រពៃណីជាតិយើង ឲ្យតែយើងមានបុណ្យប្រពៃណីខ្មែរដឹងតែផ្ទះមួយៗមានការព្យួរគោមផ្កាយតាំងពីដើមរៀងមក។គោមផ្កាយ គឺថាតំណាងឲ្យភាពខ្ពង់ខ្ពស់ ឧត្តុង្គឧត្តមនៃពិធីបុណ្យចូលឆ្នាំខ្មែរឬ មានសិរីសួស្ដី សុភមង្គល ក្នុងគ្រួសារយើង សុខដុមរមនា សប្បាយចិត្ត។បីតឹកហ្នឹងមួយម៉ឺនរៀល ហើយអាបួនតឹកមួយម៉ឺនបួនពាន់រៀល អាប្រាំតឹកមួយម៉ឺនប្រាំមួយពាន់រៀលអីចឹងទៅ ទៅតាមគោម សាច់ក្រណាត់ សាច់ក្រមា សាច់ថង់»។

អ្នកស្រី ទូច ស្រីលក្ខណ៍ ប្រជាពលរដ្ឋនៅរាជធានីភ្នំពេញបានប្រាប់វិទ្យុជាតិកម្ពុជាថា ជារៀងរាល់ឆ្នាំនាឱកាសពិធីបុណ្យចូលឆ្នាំថ្មី ប្រពៃណីជាតិខ្មែរ នៅភូមិកំណើតរបស់អ្នកស្រី អ្នកភូមិតែងតែមានការតាំងលម្អគោមផ្កាយចម្រុះពណ៌សឹងតែគ្រប់ផ្ទះមិនចន្លោះ នៅតាមវត្តក៏ដូចគ្នាដែរ គឺមានការតាំងបង្ហាញនូវប្រដាប់ប្រដាប្រើប្រាស់ប្រចាំថ្ងៃលក្ខណៈខ្មែរយើងដូចជា មួកស្លឹកត្នោត បំពង់ទឹកត្នោត កន្ទេលស្លឹកត្នោត ទូកត្នោត ស្មុគ ទ្រូ និងប្រដាប់ប្រដាប្រើប្រាស់ប្រចាំថ្ងៃផ្សេងៗទៀតដែលជាអត្តសញ្ញាណខ្មែរ។សម្រាប់ឆ្នាំនេះអ្នកស្រីបានទិញគោមផ្កាយច្រើនគួរសម ដាក់ព្យូរនៅផ្ទះ និងតាមរបងផ្ទះ និងដាក់បន្ថែមអំពូលភ្លើងចម្រុះពណ៌ ឲ្យកាន់តែស្អាតថែមទៀត។ «ចាបង និយាយទៅទិញគោមថែមរាល់តែឆ្នាំហ្នឹង មានសល់ខ្លះដែរតែចេះតែទិញទៀតទៅព្រោះឃើញគេធ្វើលក់ស្អាតៗ និងប្លែកៗ។នៅភូមិខ្ញុំភាគច្រើនគេទៅលេងនៅវត្តទាំងពេលយប់ និងពេលថ្ងៃ ព្រោះនៅវត្តគេមានការលេងល្បែងរបាំប្រជាប្រិយខ្មែរ ច្រើន។ ការប្រគុំតន្រ្តីទាញព្រ័ត្រ និងរាំលេងកម្សាន្តជាដើម។ អញ្ជឹងការតុបតែងលម្អមានភ្លើងពណ៌ច្រើនមើលទៅចង់ទៅលេងហ្មង ហើយនៅតាមផ្លូវវិញសុទ្ធតែភ្លើងអំពូល និងគោមព្រោងព្រាតហ្នឹង»។

បើតាមប្រពៃណីព្យួរគោម ពេលចូលឆ្នាំខ្មែរ ដែលចងក្រងដោយ អ្នកស្រី កែវ ច័ន្ទបូរណ៍គឺ ការប្រារព្ធចូលឆ្នាំខ្មែរ ស្ថិតនៅរដូវក្តៅហើយស្ងួតបំផុត ពិបាកដើរលេងពេលថ្ងៃ ជាពិសេសពេលថ្ងៃត្រង់និងរសៀល ទើបគេបង្កើតប្រពៃណីព្យួរគោម បំភ្លឺសម្រាប់ធ្វើបុណ្យពេលយប់ ឲ្យមនុស្សបានមើលផ្លូវ នឹងបានដើរលេងសប្បាយ ជុំគ្នា ត្រជាក់ត្រជុំរមនា ទាល់ៗភ្លឺ ដោយមិនមានអសន្តិសុខ។ម៉្យាងទៀត ដើម្បីលម្អលំនៅឋាន ឲ្យមានសោភណភាពចិញ្ចាចចញ្ចែង ប្រកបដោយមង្គល និងគួរជាទីរមនាក្នុងដួងចិត្តសម្រាប់បងប្អូនប្រជាពលរដ្ឋគ្រប់ៗរូប។យើងក៏សង្កេតឃើញផងដែរថា ការប្រារព្វប្រពៃណីចងគោមនេះ នៅមានសល់នៅក្នុងជនជាតិខ្មែរ ដែលរស់នៅប្រទេសថៃ និង ប្រទេសឡាវ បានស្វាគមន៍ទទួលយក និងថែមទាំងជំរុញឲ្យជនជាតិរបស់គេ បង្កើតរចនាបថថ្មីៗ ដើម្បីជាការប្រារព្ធសប្បាយរីករាយទាំងអស់គ្នាថែមទៀតផង។មិនតែប៉ុណ្ណោះ ការតាំងលម្អគោម ដើម្បីជាសក្ខីភាពពរជ័យទេវតាប្រោះព្រំ ឲ្យប្រជាពលរដ្ឋគ្រប់គ្នា បានទទួលនូវរាសីជោគជតា ល្អពណ្ណរាយរុងរឿង ក្នុងឱកាសពិធីបុណ្យនេះ។បន្ថែមពីនេះទៀតដើម្បីជាពន្លឺប្រកាស ដាស់ហៅព្រលឹងដូនតា ឲ្យមកចូលរួមប្រារព្ធបុណ្យចូលឆ្នាំជាមួយកូនចៅ ជួបជុំគ្នា ហើយមកប្រោះព្រំកូនចៅ ឲ្យរស់នៅត្រជាក់ត្រជុំ ចាកផុត ពីភាពរាំងស្ងួត ខ្វះខាត យល់តែភាពសំបូរសប្បាយ ត្រកុំត្រកាលជានិច្ចនិរន្តរ៍៕

ដោយ៖ វិទ្យុជាតិកម្ពុជា