លោក ជា វុទ្ធី លើកទឹកចិត្តសម្ព័ន្ធឧស្សាហកម្មកៅស៊ូវៀតណាមប្រចាំកម្ពុជាបង្កើតតំបន់កសិ-ឧស្សាហកម្ម កំពុងមានតម្រូវការកើនឡើង

ភ្នំពេញ៖ លោក ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា បានលើកទឹកចិត្តឱ្យសម្ព័ន្ធឧស្សាហកម្មកៅស៊ូវៀតណាមប្រចាំកម្ពុជា បណ្តាក់ទុនវិនិយោគបង្កើតតំបន់កសិ-ឧស្សាហកម្មមួយដើម្បីប្រមូលផ្តុំក្រុមហ៊ុនធ្វើការកែច្នៃជ័រកៅស៊ូ ដើមកៅស៊ូ ឬកសិផលផ្សេងៗទៀត កំពុងមានតម្រូវការកើនឡើងពីមួយថ្ងៃទៅមួយថ្ងៃ។

តាមការលើកទឹកចិត្តនេះ លោក ជា វុទ្ធី បានទទួលជួបពិភាក្សាការងារជាមួយគណៈប្រតិភូសម្ព័ន្ធឧស្សាហកម្មកៅស៊ូវៀតណាមប្រចាំកម្ពុជា ដឹកនាំដោយលោក Trương Minh Trung អគ្គនាយករងទី១នៃក្រុមហ៊ុន Vietnam Rubber Group និងជាប្រធានគណៈកម្មាធិការអភិវឌ្ឍកៅស៊ូ ១០០.០០០ហិកតា នៅកម្ពុជា។

ជំនួបពិភាក្សានេះ នៅថ្ងៃទី៣ ខែមេសា ឆ្នាំ២០២៥ នាទីស្តីការក្រុមប្រឹក្សាអភិវឌ្ឍន៍កម្ពុជា អគ្គលេខាធិការ បានថ្លែងនូវការកោតសរសើរចំពោះសម្ព័ន្ធឧស្សាហកម្មកៅស៊ូវៀតណាមប្រចាំកម្ពុជា ដែលបានខិតខំជំរុញការអភិវឌ្ឍឧស្សហកម្មកៅស៊ូនៅកម្ពុជានាពេលកន្លងមក និងបានចូលរួមក្នុងសកម្មភាពសង្គមមួយចំនួន។

នាឱកាសនោះ លោក ក៏បានជម្រាបជូនគណៈប្រតិភូដោយសង្ខេបពីស្ថានភាពថ្មីៗនៃបរិយាកាសវិនិយោគនៅកម្ពុជា ព្រមទាំងបានលើកឡើងពីវត្តមានរបស់ក្រុមហ៊ុនផលិតសំបកកង់យានយន្តនៅកម្ពុជា ដែលបានធ្វើឱ្យមានកំណើននៃតម្រូវការជ័រកៅស៊ូក្នុងស្រុក។

លោក ជា វុទ្ធី បានលើកទឹកចិត្តឱ្យសម្ព័ន្ធឧស្សាហកម្មកៅស៊ូវៀតណាមប្រចាំកម្ពុជា ធ្វើការបណ្តាក់ទុនវិនិយោគបង្កើតតំបន់កសិ-ឧស្សាហកម្មមួយដើម្បីប្រមូលផ្តុំក្រុមហ៊ុនធ្វើការកែច្នៃជ័រកៅស៊ូ ដើមកៅស៊ូ ឬកសិផលផ្សេងៗទៀតដែលកំពុងមានសក្តានុពល ដើម្បីផ្គត់ផ្គង់ដល់ឧស្សាហកម្មក្នុងស្រុកដែលកំពុងមានតម្រូវការកើនឡើងពីមួយថ្ងៃទៅមួយថ្ងៃ។

ក្នុងជំនួប លោក Trương Minh Trung បានជម្រាបជូនពីវឌ្ឍនភាពការងាររបស់សម្ព័ន្ធឧស្សាហកម្មកៅស៊ូវៀតណាមប្រចាំកម្ពុជា និងបានបង្ហាញពីចំណាប់អារម្មណ៍ក្នុងការពង្រីកការវិនិយោគក្នុងវិស័យផលិតថាមពលស្អាតនៅកម្ពុជា ដោយបានស្នើសុំការគាំទ្រពីក្រុមប្រឹក្សាអភិវឌ្ឍន៍កម្ពុជា។

តាមការលើកទឹកចិត្ត ឱ្យសម្ព័ន្ធឧស្សាហកម្មកៅស៊ូវៀតណាមប្រចាំកម្ពុជា បណ្តាក់ទុនវិនិយោគបង្កើតតំបន់កសិ-ឧស្សាហកម្ម លោក Trương Minh Trung បានឯកភាពតាមសំណើរបស់អគ្គលេខាធិការ។

ជាការឆ្លើយតប អគ្គលេខាធិការ បានសម្តែងនូវការគាំទ្រដល់គម្រោងពង្រីកការវិនិយោគរបស់ក្រុមហ៊ុនក្នុងវិស័យផលិតថាមពលស្អាតនៅកម្ពុជា។ លោក បានគូសបញ្ជាក់ថា ក្រុមប្រឹក្សាអភិវឌ្ឍន៍កម្ពុជានៅតែបន្តគាំទ្រ ថែទាំការវិនិយោគរបស់វៀតណាមដែលកំពុងមានសកម្មភាពនៅកម្ពុជា និងរង់ចាំស្វាគមន៍ដោយក្តីរីករាយចំពោះការវិនិយោគបន្ថែមពីវៀតណាម៕

ដោយ៖ មឿន ឌីណា (Moeun Dyna)