ភ្នំពេញ៖ នាពេលបច្ចុប្បន្ននេះ យើងក្រឡេកឃើញថា ចន សុទីម៉ា បវរកញ្ញាទេសចរណ៍ (Miss Tourism International 2019) ក្រៅពីមានរូបសម្រស់ស្រស់ស្អាតហើយ តារាស្រីរូបនេះ ក៏នូវមានទេពកោសល្យ សមត្ថភាព និងចំណេះដឹងជាច្រើនទៀតផងដែរ ពិសេសមួយរយៈនេះ នាងក៏កំពុងមានសន្ទុះនៃការគាំទ្រច្រើនមិនធម្មតា ទៅលើការងារសិល្បៈ ដូចជាការដើរម៉ូត ថតផ្សព្វផ្សាយឲ្យក្រុមហ៊ុននានា ក៏ដូចជាការសម្ដែងផងដែរ។

ម្យ៉ាងវិញទៀត ក្រៅពីការងារជោគជ័យអស់ទាំងនោះ តារាស្រីញញឹមស្រស់រូបនេះ ក៏ទទួលបានការគាំទ្រ និងការពេញចិត្តពេញថ្លើមពីមហាជនគ្រប់គ្នាដែរ ទៅលើការគ្រងនូវឈុតសម្លៀកបំពាក់បែបបុរាណផ្សេងៗ ដែលជារឿយៗ តារាស្រីរូបនេះ ធ្លាប់បានគ្រងបែបជាឈុត អប្សរា និងឈុតរាជនីអង្គរជាដើម។

ដោយឡែក ក្នុងពេលថ្មីៗនេះ យោងតាមគណនីហ្វេសប៊ុក Lux Rayuth ទើបតែបានបង្ហោះរូបភាពថ្មីៗ របស់ ចន សុទីម៉ា ដោយនាងបានគ្រងនូវឈុតព្រះម៉ែគង្គាវិញម្ដង ដែលក្នុងនោះក្រុមអ្នករៀបចំ ពិតជាមានការរៀបចំបានសម្រិតសម្រាំងយ៉ាងប្រណីតពេញមួយតួខ្លួនតែម្ដង ទើបអាចធ្វើឲ្យ សុទីម៉ា គ្រងឈុតនោះ បានយ៉ាងសាកសមខ្លាំងបំផុត ពោលគឺមួយតួខ្លួន ស្អាតរហូតមើលសឹងតែមិនចង់ស្គាល់ថាជានាងនោះឡើយ។ 

យ៉ាងណាមិញ តាមរយៈរូបភាពទាំងនោះ ក៏បានធ្វើឲ្យមហាជនមានការពេញចិត្ត និងនាំគ្នាចែករំលែកជាហូរហែរ នៅលើបណ្ដាញសង្គម ដោយភ្ជាប់ជាមួយ ពាក្យសរសើរមិនដាច់ពីមាត់ផងដែរ៕

ចង់ជ្រាបជច្បាស់ទស្សនារូបភាពខាងក្រោម៖

រូបភាពពី៖ Lux Salon & Studio