ពូជអ្វី! ល្ពៅមួយផ្លែ បានបំបែកកំណត់ត្រា ដោយមានទម្ងន់ដល់ទៅ ៨៦៧គីឡូក្រាម ក្នុងពិធីបុណ្យមួយនៅអូស្រ្តាលី

អូស្រ្តាលី៖ លោក  Dale Oliver ជាអ្នកដាំល្ពៅយក្សមួយនេះ បានបំបែកកំណត់ត្រាថ្មីដែលវាមានទម្ងន់ដល់ទៅ ៨៦៧គីឡូក្រាមធ្ងន់បំផុតនៅក្នុងពិធីបុណ្យផ្លែល្ពៅ​ និងឪឡឹកយក្សនៅឆ្នាំ ២០២១នេះ​ក្នុងទីក្រុង Kyogle ប្រទេសអូស្រ្តាលី។

អ្នករៀបចំពិធីបុណ្យលោក John Leadbetter បានប្រាប់ឱ្យដឹងថា​ នេះគឺជាជោគជ័យដ៏អស្ចារ្យមួយសម្រាប់លោក Oliver និងពិធីបុណ្យនេះ។ ប៉ុន្តែកសិករចូលរួមក្នុងការប្រកួតនេះ  គឺមិនសូវជាមានភាពគគ្រឹកគគ្រេងនោះទេ ដោយសារអាកាសធាតុមិនអំណោយផលដល់ដំណាំរបស់ពួកគេ។

យ៉ាងណាមិញ លោក Oliver បានបង្ហើបថា កត្តាដែលនាំឱ្យគាត់ដាំបាន​ល្ពៅយក្សនេះគឺទាមទារការបញ្ចេញកម្លាំងពលកម្មច្រើនដូចជា ការមើលថែទាំ, ការកាត់ស្មៅចេញ, ការដាក់ជី និងការធ្វើតេស្តដីជាមុនសិន ហើយម៉្យាងទៀតអាកាសធាតុអំណោយផលក៏ជាកត្តាយ៉ាងសំខាន់មួយផងដែរ។

គួររម្លឹកដែរថា កាលពីឆ្នាំ ២០២០កន្លងទៅ ពិធីបុណ្យខាងលើនេះបានកត់ត្រាល្ពៅយក្សមានទម្ងន់ត្រឹមតែ ៨៦០គីឡូក្រាមប៉ុណ្ណោះ ខុសគ្នានឹងឆ្នាំ២០២១នេះ ៨៦៧គីឡូក្រាម៕