WHO អំពាវនាវឱ្យបន្ដការចាក់វ៉ាក់សាំង AstraZeneca ពីព្រោះគ្មានភស្តុតាង អំពីការកកឈាមទេ

បរទេស៖ ​បន្ទាប់ពីប្រទេសជាសមាជិកសហភាពអ៊ឺរ៉ុបធំៗ មួយចំនួនបានបញ្ឈប់ការចាក់ថ្នាំ Oxford-AstraZeneca អង្គការសុខភាពពិភពលោក (WHO) បានជំរុញឱ្យប្រទេសនានាបន្តចាក់វ៉ាក់សាំងកូវីដ១៩នេះ   ព្រោះគ្មានភស្ដុតាង​ដែលអាចបញ្ជាក់ថា វ៉ាក់សាំងនេះធ្វើឱ្យមានការកកឈាមនោះទេ។

ក្នុងនោះ បណ្ដាប្រទេសធំៗនៅអឺរ៉ុបមួយចំនួនដូចជា អាល្លឺម៉ង់ បារាំង អ៊ីតាលី និងអេស្ប៉ាញបា​នសហការជាមួយបណ្ដាប្រទេសដទៃៗទៀត ក្នុងការបញ្ឈប់ការចាក់វ៉ាក់សាំង AstraZeneca បណ្ដោះអាសន្ន ដើម្បីត្រួតពិនិត្យសុវត្ថិភាពនៃវ៉ាក់សាំងបន្ថែម។

ជុំវិញបញ្ហានេះ អ្នកជំនាញផ្នែកសុវត្ថិភាពវ៉ាក់សាំង មកពីអង្គការសុខភាពពិភពលោក នឹងធ្វើការជួបប្រជុំគ្នានៅថ្ងៃអង្គារនេះហើយ ដើម្បីពិភាក្សាទៅលើបញ្ហាវ៉ាក់សាំងខាងលើ។ ទន្ទឹមនឹងនោះ ទីភ្នាក់ងារឱសថអឺរ៉ុប (EMA) ក៏នឹងធ្វើជំនួបគ្នានៅក្នុងថ្ងៃតែមួយផងដែរ ហើយនឹងធ្វើការសម្រេចនៅថ្ងៃព្រហស្បតិ៍ខាងមុខនេះ។

យ៉ាងណាមិញ អ្នកនាំពាក្យ WHO លោក Christian Lindmeier បានគូសបញ្ជាក់ថា បច្ចុប្បន្ននេះ ស្ថាប័នកំពុងធ្វើការស៊ើបអង្កេតទៅលើបញ្ហានេះ នឹងធ្វើការប្រកាសជាសាធារណៈ បន្ទាប់ពីត្រួតពិនិត្យសព្វគ្រប់ ហើយអាជ្ញាធរនៃបណ្ដាប្រទេសនីមួយគួរបន្តយុទ្ធនាការចាក់វ៉ាក់សាំងនេះ ដើម្បីជួយដល់ជីវិតមនុស្ស និងទប់ស្កាត់វីរុសដ៏កាចសាហាវនេះវិញ។

គួរជម្រាបថា នៅសហភាពអឺរ៉ុប និងចក្រភពអង់គ្លេស មានមនុស្សប្រមាណជា ១៧លាននាក់ហើយ ដែលបានចាក់វ៉ាក់សាំង AstraZeneca ហើយក្នុងនោះមានតែ ៤០ករណីប៉ុណ្ណោះ ដែលមានកំណកឈាម៕