លាហើយថ្ងាសឆក! iPhone 14 Pro បញ្ចេញជាផ្លូវការ ដោយប្ដូរមកប្រើរន្ធទម្លុះអេក្រង់ ដ៏ឆ្លាតវៃហើយ

បរទេស​៖ កាលពីយប់មិញនេះ ក្រុមហ៊ុន Apple បានប្រកាសបង្ហាញទូរសព្ទ iPhone ជំនាន់ថ្មី នោះគឺស៊េរី iPhone 14 ហើយអ្វីដែលគួរឲ្យចាប់អារម្មណ៍បំផុត គឺម៉ូឌែល Pro តែម្ដង។ iPhone 14 Pro និង iPhone 14 Pro Max មកជាមួយកាមេរ៉ាថ្មី ការរចនារន្ធទម្លុះអេក្រង់ថ្មី និងបន្ទះឈីបថ្មី។ អ្នកក៏អាចធ្វើការទាក់ទង សេវាសង្គ្រោះបន្ទាន់តាមរយៈផ្កាយរណប ប្រសិនបើអ្នកស្ថិតក្នុងតំបន់ដាច់ស្រយាល ខណៈអាចទាក់ទងបានជាមួយផ្កាយរណប។ សេវាកម្មនេះនឹងបង្ហាញខ្លួនជាលើកដំបូង តែនៅក្នុងសហរដ្ឋអាមេរិកនិងកាណាដាប៉ុណ្ណោះ ក្នុងខែវិច្ឆិកា ហើយនឹងឥតគិតថ្លៃសម្រាប់រយៈពេលពីរឆ្នាំដំបូង។

ការផ្លាស់ប្ដូរដែលអាចមើលឃើញច្បាស់បំផុត នោះគឺរន្ធទម្លុះអេក្រង់នៅផ្នែកខាងលើនៃអេក្រង់។ វាមានលក្ខណៈតូចជាង ស្នាមឆកស៊េរីចាស់ ហើយវាបានធ្វើឲ្យកាមេរ៉ាដែលនៅពីខាងក្នុង តូចជាងមុន30%។ Apple បានហៅរន្ធទម្លុះអេក្រង់ថ្មីនេះថា Dynamic Island។ បរិវេណជុំវិញរន្ធទម្លុះអេក្រង់នឹងផ្លាស់ប្ដូរ ដើម្បីផ្ដល់ភាពងាយស្រួលក្នុងការគ្រប់គ្រងកម្មវិធីដែលកំពុងដំណើរការ ដូចជា Maps ឬ Music ឬកម្មវិធីផ្សេងៗក្រៅពីរបស់ Apple។

បើនិយាយពីអេក្រង់វិញ ម៉ូឌែល Pro មានទំហំ6.1អ៊ីញ ចំណែក Pro Max វិញ គឺ6.7អ៊ីញ ដែលឥឡូវអេក្រង់នេះអាចបញ្ចេញពន្លឺកំពូល 2,000 nits សម្រាប់មាតិកា HDR, ហើយវាក៏មានការគ្រប់គ្រងថ្មី លើល្បឿន refresh rate ទាបរហូតដល់ 1Hz។ ទីបំផុត មុខងារ Always-On Display បានមានវត្តមានលើផលិតផលរបស់ Apple ដែលផ្ដាច់មុខទៅលើម៉ូឌែល Pro ទាំងនេះ។ ម៉ោង, widgets, និង Live Activities នឹងអាចមើលឃើញភ្លាម នៅលើ Always-On Display​ នេះ។

ចំពោះផ្នែកកាមេរ៉ាវិញ សេនស័រគោលរបស់វាមានទំហំដល់ 48MP ហើយតាមលំនាំដើមទូរសព្ទ វានឹងថតក្នុងកម្រិត 12MP។ ចំពោះឡេនទូលាយវិញមានទំហំ 12MP និងកាមេរ៉ា telephoto 3x ទំហំ 12MP ក៏មានវត្តមានផងដែរ។ iPhone 14 Pro និង Pro Max ប្រើប្រាស់ឈីប A16 Bionic ដែលល្អប្រសើរជាងឈីបជំនាន់មុន។ ទាំង iPhone 14 Pro និង iPhone 14 Pro Max នឹងមានជម្រើសពណ៌ដូចជា ខ្មៅ, ប្រាក់, មាស, ស្វាយ ជាមួយទំហំផ្ទុក 128/256/512GB និង 1TB និងទំហំរ៉េម 6GB។ 

ការកម្ម៉ង់ទុកមុន នឹងចាប់ផ្ដើមនៅថ្ងៃទី9 ខែកញ្ញា ហើយនឹងចេញលក់នៅថ្ងៃទី16 ខែកញ្ញា។ ចំពោះតម្លៃចាប់ផ្ដើមនៅក្នុងសហរដ្ឋអាមេរិក iPhone 14 Pro មានតម្លៃចាប់ពី $999 ខណៈដែល iPhone 14 Pro Max មានតម្លៃចាប់ពី $1,099។ ទូរសព្ទទាំងនេះនឹងមិនមានរន្ធដាក់ស៊ីមកាតទេ សម្រាប់ទីផ្សារសហរដ្ឋអាមេរិក ដោយពួកវាពឹងផ្អែកលើ eSIM តែប៉ុណ្ណោះ៕

ប្រភព: GSMArena