នារីសញ្ជាតិខ្មែរម្នាក់ បានក្លាយជាម្ចាស់ប្រាសាទមួយ មានអាយុកាលប្រហែលប្រាសាទអង្គរវត្ត

កម្សាន្ត៖ ថ្មីៗនេះ មានការភ្ញាក់ផ្អើលនៅក្នុងបណ្ដាញសង្គម ដោយនារីជនជាតិខ្មែរម្នាក់ ដែលរស់នៅក្រៅប្រទេសបានចែករំលែករឿងដ៏អស្ចារ្យមួយ។ នៅក្នុងនោះ នារីឈ្មោះ ម៉ៅ ម៉ានិច្ច បានប្រកាសថា ខ្លួនបានក្លាយជាម្ចាស់ប្រាសាទ Branderbourg នៃប្រទេសលុចសាំប៊ួរ។

លើសពីនោះ នាងបានឆ្លើយតបខមិនថា ប្រាសាទមួយនេះ មានអាយុកាលប្រហាក់ប្រហែលនឹងប្រាសាទអង្គរវត្តខ្មែរផងដែរ។ នាងបានសរសេររៀបរាប់បង្ហាញនូវក្ដីរំភើបថា តាមច្បាប់វង្សត្រកូល​គ្រួសាររបស់ស្វាមីនាងគឺ កូនប្រសារ​ ដែលជាសាច់ថ្លៃ មិនអាចចូលឈ្មោះជាម្ចាស់ប្រាសាទបានទេ​ មានតែកូនបង្កេីតប៉ុណ្ណោះ​។

ប៉ុន្តែស្វាមីរបស់ ម៉ៅ ម៉ានិច្ច រូបនេះ ​បានសំណូមពរដល់គ្រួសារទាំងអស់គ្នា ដេីម្បីផ្តល់កិត្តិយសអោយខ្លួន​ ​មានឈ្មោះខ្មែរចារក្នុងសៀវភាវប្រវត្តិសាស្រ្តប្រាសាទ​ Brandenbourg។ នេះបញ្ជាក់ឲ្យឃើញថា ស្វាមីរបស់នាងបានផ្ដល់តម្លៃឲ្យនាង ដែលមនុស្សស្រីគ្រប់រូបប្រាថ្នាចង់បាន។

មិនតែប៉ុណ្ណោះ អ្នកនាង បានបង្ហាញនូវ ជញ្ចៀនដែលជាតំណាង​និមិត្តសញ្ញា​ប្រចាំគ្រួសារ du Fays - van Delft និង ប្រាសាទ​ Brandenbourg។ ដោយនាងបានបន្ថែមថា បងប្អូនដែលបានអញ្ចេីញមកលេងអុឺរ៉ុប​ អាចឈានមកទស្សនាប្រាសាទ​ Brandenbourg នៅប្រទេសលុចសាំប៊ួរ​ ជាប់នឹងប្រទេសបារាំង​ អាល្លឺម៉ង់​និង​ប៊ែលស្សុីក​ ដែលមាននាងខ្ញុំជាខ្មែរ​ និងជាម្ចាស់ប្រាសាទផ្ទាល់ជូនបងប្អូនចូលទស្សនាផ្ទាល់តែម្តង​៕

ប្រភព៖ ម៉ៅ ម៉ានិច្ច