បែកគ្នាយូរ Jennie និង Rosé ដឹកដៃគ្នាដើរលេង កណ្ដាលក្រុងញ៉ូវយ៉ក ផ្អើលអស់ហ្វេនៗ

អាមេរិក៖ បើទោះបីជាសមាជិក BLACKPINK ទាំងអស់សម្រេចមិនបន្តកុងត្រាថ្មីជាមួយផលិតកម្ម YG Entertainment លើសកម្មភាពទោលក៏ដោយ ក៏ពួកគេនៅតែអាចនឹងចេញចម្រៀងជាក្រុម ហើយសមាជិកនីមួយៗក៏នៅតែបន្តទាក់ទងគ្នាផងដែរ។

ជាក់ស្ដែង កាលពីពេលថ្មីៗទៅនេះ Rosé បានបង្ហោះរូបភាពថានាងបានចួបជាមួយនឹង Jennie នៅកណ្ដាលក្រុងញ៉ូវយ៉ក បន្ទាប់ពីអ្នកទាំងពីរធ្វើដំណើរទៅទីនោះដូចគ្នា។

នៅក្នុងរូបភាពដែលចែករំលែកនោះ គេឃើញថា Jennie និង Rosé ស្លៀកពាក់បែបសាមញ្ញៗធម្មតា ដោយ Jennie បានស្លៀកខោពណ៌ស្លាទុំ អាវពណ៌សពាក់ពីលើដោយអាវចាក់ពាក់កណ្ដាលខ្លួនពណ៌ខៀវគូជាមួយនឹងវ៉ែនតាខ្មៅ ខណៈដែល Rosé ស្លៀកខោខ្មៅនិងអាវចាក់ពណ៌ខ្មៅ និងវ៉ែនតាខ្មៅដែរ ដោយពួកគេបានបណ្ដើរគ្នាយ៉ាងស្អិតរមួតនិងបានចូលទៅញ៉ាំអាហារនៅភោជនីយដ្ឋានក្បែរនោះទៀតផង៕  

ប្រភព៖ allkpop