គ្រូ Jose សប្បាយចិត្តគ្រាប់បាល់ចុងម៉ោងពេក រត់អបអរដោយស្លាយជង្គង់លើស្មៅ ចុងក្រោយខុសបច្ចេកទេសដួលពីរ បីត្រឡប់(មានវីដេអូ)

បរទេស៖ វីដេអូដ៏គួរឱ្យអស់សំណើចមួយ កំពុងត្រូវបានគេចាប់អារម្មណ៍ខ្លាំងមែនទែន បន្ទាប់ពីគ្រូបង្វឹករបស់ Fenerbahce លោក Jose Mourinho បានរត់អបអរគ្រាប់បាល់ចុងម៉ោងរបស់ក្រុមខ្លួន ដោយស្លាយជង្គង់នៅលើស្មៅ ចុងក្រោយខុសបច្ចេកទេសក៏បានដួលពីរ បីត្រឡប់នៅលើទីលាន។

នៅក្នុងការប្រកួតក្របខណ្ឌ Super Lig នៃលីគកំពូល តួកគី កាលពីយប់មិញនេះត្រូវនឹងថ្ងៃទី ៣ ខែ វិច្ឆិកា ក្រុម Fenerbahce បានទទួលជ័យជម្នះទៅលើក្រុម Trabzonspor ក្នុងលទ្ធផលយ៉ាងតឹងតែង ៣ ទល់នឹង ២។

មែនទែនទៅ មុន Fenerbahce ដែលជាក្រុមរបស់លោក Mourinho ទទួលបានជ័យជម្នះ ក្រុមទាំង ២ បានបន្លាយលទ្ធផលស្មើគ្នា ២-២ ដល់ទៅនាទីទី ៩០+១២ ឯណោះ ហើយចុងក្រោយនៅក្នុងនាទីនេះដដែល ទើបខ្សែបម្រើ Sofyan Amrabat រកបានមួយគ្រាប់ចុងក្រោយ ជួយឱ្យ Fenerbahce យកឈ្នះ Trabzonspor ជាផ្លូវការ។

យ៉ាងណាមិញ តាមរយៈគ្រាប់បាល់មួយគ្រាប់នេះ បានធ្វើឱ្យគ្រូបង្វឹកលោក Jose Mourinho សប្បាយចិត្តខ្លាំងមែនទែន រហូតដល់លោកបានរត់ចូលក្នុងទីលាន ដោយប្រើស្ទាយ៍ស្លាយជង្គង់ ដើម្បីអបអរគ្រាប់បាល់នោះជាមួយកូនក្រុម ប៉ុន្តែអ្វីៗដូចជាអស់សំណើចបន្តិច បន្ទាប់ពីលោកស្លាយជង្គង់ខុសបច្ចេកទេស ហើយក៏ដួលពីរ បីត្រឡប់៕

សូមទស្សនាវីដេអូខាងក្រោម៖

ប្រភព៖ Sportbible