បើ Amorim អត់ប្រើទុកឱ្យគ្រូម្តង! លោក Van Nistelrooy ចង់បានអតីតកូនក្រុមនៅ Man UTD រូបនេះមកកាន់ Leicester

បរទេស៖ អ្នកចាត់ការថ្មីរបស់ក្រុមកញ្ជ្រោងខៀវ Leicester City លោក Ruud van Nistelrooy កំពុងមានគម្រោងចង់បានអតីតកូនក្រុមនៅ Manchester United ខ្សែការពារ Victor Lindelof មកកាន់ទឹកដី King Power នៅទីផ្សារដោះដូរកីឡាករខែ មករា ខាងមុខនេះ នេះបើតាមការចុះផ្សាយដោយអ្នកកាសែតលោក Graeme Bailey។

ជាការពិតណាស់ Lindelof អាចនឹងត្រូវគេភ្លេចមុខថាជាកីឡាកររបស់ក្រុមបិសាចក្រហមបាត់ទៅហើយ ដោយសារតែមួយរយៈចុងក្រោយនេះ រូបគេពុំសូវបានបង្ហាញខ្លួននៅលើទីលានទាល់តែសោះ ជាពិសេសចាប់តាំងពីការមកដល់របស់លោក Ruben Amorim ដោយលោកតែងតែប្រើប្រព័ន្ធការពារបីខាងក្រោមជាមួយ Matthijs de Ligt, Lisandro Martinez, Noussair Mazraoui ឬ Harry Maguire ប៉ុណ្ណោះ។

យ៉ាងណាមិញ ដោយសារតែការបាត់បង់នាទីលេងបែបនេះហើយ ទើបធ្វើឱ្យខ្សែការពារសញ្ជាតិ ស៊ុយអែត វ័យ ៣០ ឆ្នាំរូបនេះ កំពុងគិតគូចង់ចាកចេញពីទឹកដី Old Trafford នៅខែ មករា នេះតែម្តង ហើយឆ្លៀតក្នុងឱកាសនេះ លោក Van Nistelrooy កំពុងដាក់ផែនការចង់បានរូបគេមករួមក្រុមជាមួយលោកជាថ្មីនៅទឹកដី King Power វិញម្តង។

គួរបញ្ជាក់ថា កិច្ចសន្យារវាង Victor Lindelof ជាមួយនឹង Man UTD គឺនឹងផុតសុពលភាពនៅដំណាច់រដូវកាលនេះហើយ ពោលគឺត្រឹមចុងខែ មិថុនា ឆ្នាំ ២០២៥៕

ប្រភព៖ Sportskeeda