របស់ល្អ ដាក់តម្លៃថ្លៃតិចហើយ! Barca អត់ស្ទាក់ស្ទើរលក់ Araujo ចេញទេ ក្លិបណាហ៊ានឱ្យតម្លៃប៉ុណ្ណេះ យកគេទៅចុះ

បរទេស៖ ក្លិបអ្នកមានបុណ្យ FC Barcelona ចង់បានតម្លៃផ្ទេរយ៉ាងហោចណាស់ ៤៥ លានអឺរ៉ូ ឬប្រមាណជា (៤៦ លានដុល្លារអាមេរិក) ទៅ ៥០ លានអឺរ៉ូ ឬប្រមាណជា (៥១ លានដុល្លារអាមេរិក) ពីការដាក់លក់ខ្សែការពារ Ronald Araujo ខណៈបច្ចុប្បន្នខ្សែការពារសញ្ជាតិ អ៊ុយរូហ្គាយវ័យ រូបនេះកំពុងមានមានទំនាក់ទំនងផ្ទេរជាមួយក្លិបសេះបង្កង់ Juventus នេះបើយោងតាមការចុះផ្សាយដោយអ្នកកាសែត Jordi Carne Sempere។

Ronald Araujo ត្រូវបាន Barcelona ទិញចូលកាលពីនៅថ្នាលយុវជនជាមួយក្រុម Boston Rivers ក្នុងឆ្នាំ ២០១៨ ក្នុងតម្លៃ ៤.៧ លានអឺរ៉ូ ឬប្រមាណជាជិត (៥ លានដុល្លារអាមេរិក)។ យ៉ាងណាមិញ ចំពោះការបង្ហាញខ្លួនជាមួយក្រុមអ្នកមានបុណ្យកន្លងមក រូបគេបានរួមចំណែកដើរតួយ៉ាងសំខាន់នៅក្នុងតំបន់ការពារ ក្នុងនោះរូបគេក៏បានស៊ុតបញ្ចូលទី ៨ គ្រាប់ និងរកបាន ៦ assist ផងដែរ។

ទោះបីជាយ៉ាងណាក៏ដោយ ថ្មីៗនេះអ្នកកាសែត អ៊ីតាលី លោក Fabrizio Romano បានចុះផ្សាយថា ខ្សែការពារសញ្ជាតិ អ៊ុយរូហ្គាយវ័យ ២៥ ឆ្នាំរូបនេះ កំពុងតែពិចារណាចង់ចាកចេញពី Barcelona ភ្លាមៗ ដោយសារតែគេមិនសប្បាយចិត្តនឹងស្ថានភាពរបស់ក្លិបបច្ចុប្បន្ន៕

គួរបញ្ជាក់ថា Ronald Araujo គឺនៅសល់កិច្ចសន្យារយៈពេល ១ ឆ្នាំកន្លះទៀតជាមួយ Barcelona ពោលគឺដល់ខែ មិថុនា ឆ្នាំ ២០២៦

ប្រភព៖ Sportskeeda