អីយ៉ាស់! លោក Solskjaer កំពុងទទូចឲ្យ Besiktas ទិញយកតារាឆ្នើម Man UTD រូបនេះឲ្យបានមុនទីផ្សារបិទ

អឹរ៉ុប៖ គ្រូបង្វឹកក្លិប Besiktas លោក Ole Gunnar Solskjaer ត្រូវបានគេរាយការណ៍ថា កំពុងណែនាំថ្នាក់លើរបស់ក្លិបឲ្យចុះហត្ថលេខានាំយក Casemiro មករួមក្រុម។

ជាការពិតណាស់ កាលពីសប្តាហ៍មុន លោក Solskjaer ត្រូវបានតែងតាំងជាគ្រូបង្វឹកថ្មីរបស់ Besiktas ក្រោយលោកសម្រាកពីការងារបាល់ទាត់តាំងតែពីឆ្នាំ ២០២១ បន្ទាប់ពីត្រូវបាន Man UTD បណ្តេញចេញពីតំណែង ខណៈ ការមកដល់ក្លិបថ្មីនេះ លោកក៏ត្រូវការកីឡាករចំណូលថ្មីបន្ថែមដើម្បីពង្រឹងក្រុម។

ក្នុងនោះ ទាក់ទងនឹងរឿងខាងលើ បើយោងទៅតាមការចុះផ្សាយរបស់កាសែតកីឡា AS បានលើកឡើងថា លោក Solskjaer កំពុងតែទូន្មានឲ្យ ថ្នាក់លើរបស់ Besiktas ចុះហត្ថលេខាយក Casemiro មករួមក្រុមឲ្យបាន មុនទីផ្សារដោះដូរខែមករាបិទ ខណៈ បច្ចុប្បន្ន Casemiro ក៏មានការចង់បានពីសំណាក់ក្រុមមួយចំនួននៅអារ៉ាប៊ីសាអូឌីតផងដែរ៕

ប្រភព៖ Metro