អ្នកស្រាវជ្រាវបានឱ្យដឹងថា ជាលើកដំបូងក្នុងរយៈពេលមួយសតវត្សរ៍មកនេះ ពួកគេបានរកឃើញប្រភេទសត្វឆ្មាព្រៃថ្មីមួយ ដែលពីមុនមិនធ្លាប់ត្រូវបានគេស្គាល់នៅក្នុងវិស័យវិទ្យាសាស្ត្រ។

សត្វឆ្មាប្រភេទ Leopardus tilcayo (ឬហៅថា ឆ្មាខ្លា tilcayo) មានរាងស្លីម មានស្នាមអុចៗលើដងខ្លួន និងមានត្រចៀកមូល។ វាមានទំហំតូចជាងឆ្មាក្នុងផ្ទះធម្មតា ហើយរស់នៅក្នុងតំបន់ Yungas នៃប្រទេសបូលីវី ដែលជាតំបន់ព្រៃពពក (cloud forest) ជាចំណុចប្រសព្វរវាងជួរភ្នំ Andes និងអាងទន្លេ Amazon។ ប្រភេទសត្វនេះត្រូវបានគេពិពណ៌នាជាលើកដំបូងនៅក្នុងទស្សនាវដ្ដីវិទ្យាសាស្ត្រ Current Biology កាលពីថ្ងៃព្រហស្បតិ៍។

វាជារឿងកម្រណាស់ក្នុងការរកឃើញថនិកសត្វថ្មីដែលមានទំហំធំគួរសម។ អ្នកស្រី Paola Nogales-Ascarrunz ដែលជាសហអ្នកនិពន្ធនៃការសិក្សានេះ និងជាអ្នកដឹកនាំកម្មវិធីអភិរក្សឆ្មាព្រៃមួយឈ្មោះថា Programa de Investigación de Félidos Bolivia (កម្មវិធីស្រាវជ្រាវ និងអភិរក្សសត្វឆ្មាព្រៃនៅបូលីវី) បាននិយាយថា វាមិនមែនជារឿងគួរឱ្យភ្ញាក់ផ្អើលទេដែលប្រភេទសត្វដែលទើបរកឃើញថ្មីៗភាគច្រើនមានទំហំតូច។

អ្នកស្រីបាននិយាយថា៖ «លើកនេះ វាជាសត្វឆ្មា។ នេះពិតជាជារឿងថ្មីប្លែក ហើយវាមិនធ្លាប់កើតឡើងក្នុងរយៈពេល ១០០ ឆ្នាំមកហើយ។ មិនធ្លាប់មាននរណាម្នាក់ដាក់ឈ្មោះឱ្យវា ឬពិពណ៌នាអំពីវាពីមុនមកឡើយ»។

 អ្នកស្រី Nogales-Ascarrunz ដែលការងារអភិរក្សរបស់គាត់ទទួលបានការឧបត្ថម្ភថវិកាពី National Geographic បាននិយាយថា៖ «យើងពិតជាមិនដឹងថាមានសត្វឆ្មាប្រភេទនេះប៉ុន្មានក្បាលទៀតដែលនៅរស់ក្នុងធម្មជាតិ។ យើងត្រូវការវិទ្យាសាស្ត្រ និងការសិក្សាបន្ថែមទៀតដើម្បីឆ្លើយសំណួរនេះ ដែលតាមពិតទៅវាមានសារៈសំខាន់ខ្លាំងណាស់សម្រាប់ការអភិរក្សពួកវា»។

ចំណែកឯ ចំនួនសត្វឆ្មាប្រភេទ Leopardus tilcayo នេះនៅមិនទាន់ត្រូវបានគេដឹងច្បាស់នៅឡើយទេ៕

ប្រភព៖ NBC News