ភ្នំពេញ៖ ធនាគារ វឌ្ឍនៈ អាស៊ី ចំកាត់ (ABA Bank) សូមប្រកាសថា ធនាគារជាតិកាណាដា បានទិញយកចំណែកភាគហ៊ុន 10% ដែលនៅសល់ក្នុងធនាគារ ABA។ ជាលទ្ធផលនៃការវិនិយោគបន្ថែមនេះ ធនាគារជាតិកាណាដា បានបង្កើនភាពជាម្ចាស់របស់ខ្លួននៅក្នុងធនាគារ ABA រហូតដល់ 100% តែម្តង។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
លោក Askhat Azhikhanov នាយកប្រតិបត្តិរបស់ធនាគារ ABA បានមានប្រសាសន៍ក្នុងឱកាសនេះថា៖
“ប្រតិបត្តិការចុងក្រោយរបស់ធនាគារជាតិកាណាដា បង្ហាញយ៉ាងច្បាស់ពីទំនុកចិត្តខ្ពស់របស់ធនាគារ មកលើ ABA និងមកលើទីផ្សារធនាគារនៅក្នុងប្រទេសកម្ពុជា។ ចាប់តាំងពីការវិនិយោគដំបូងរបស់ខ្លួនក្នុងឆ្នាំ 2014 ចំណែកទីផ្សាររបស់ធនាគារ ABA បានកើនឡើងគួរឲ្យកត់សម្គាល់ ជាមួយនឹងអត្រាប្រាក់កម្ចី និងប្រាក់បញ្ញើមានការកើនឡើងប្រមាណ 10%។ ធនាគារ ABA ពេលនេះ ក៏ជាស្ថាប័នហិរញ្ញវត្ថុធំទីបីនៅក្នុងប្រទេស ហើយយើងមានភាពរំភើបរីករាយយ៉ាងខ្លាំង ក្នុងការបន្តដំណើររបស់យើង ដោយជំរុញការពង្រីកទីតាំងភូមិសាស្ត្ររបស់ធនាគារ ABA និងណែនាំផលិតផលនិងសេវាកម្មលំដាប់ថ្នាក់ល្អបំផុត ជូនដល់អតិថិជនរបស់យើង”។
បើតាមប្រសាសន៍របស់លោក Louis Vachon អគ្គនាយក និងជានាយកប្រតិបត្តិរបស់ធនាគារជាតិកាណាដា ក៏បាននិយាយថា៖
“ធនាគារជាតិ [កាណាដា] ពិតជាមានមោទនភាពយ៉ាងខ្លាំង ចំពោះភាពជោគជ័យរបស់ធនាគារ ABA។ ស្ថាប័នហិរញ្ញវត្ថុមួយនេះ ត្រូវបានបង្កើតឡើងយ៉ាងល្អនៅក្នុងទីផ្សាររបស់ខ្លួន និងដើរតួយ៉ាងសំខាន់នៅក្នុងការអភិវឌ្ឍសេដ្ឋកិច្ច និងសង្គមនៅក្នុងប្រទេសមួយនេះ”។
លោកបានបន្ថែមបន្តទៀតថា៖
“ធនាគារ ABA កំពុងតែរីកចម្រើនយ៉ាងឆាប់រហ័ស និងចូលរួមចំណែកក្នុងការធ្វើឲ្យវិស័យសេវាធនាគារកាន់តែមានភាពងាយស្រួលក្នុងការប្រើប្រាស់។ គំរូអាជីវកម្មរបស់ធនាគារ ដែលផ្តោតជាចម្បងទៅលើវិស័យធនាគាររូបវន្តបុគ្គល និងអាជីវកម្មខ្នាតតូចនោះ ក៏ផ្តល់ក្តីរំពឹងពីអនាគតដ៏ប្រសើរផងដែរ”។
ធនាគារជាតិកាណាដា បានក្លាយជាភាគហ៊ុនិករបស់ធនាគារ ABA នៅក្នុងឆ្នាំ 2014 ដោយបានទិញយកចំណែកភាគហ៊ុនចំនួន 10%។ ហើយបន្ទាប់មកក៏បានបង្កើនការទិញយកចំណែកភាគហ៊ុនបន្ថែមរហូតដល់ 42% នៅក្នុងឆ្នាំ2015 និងបង្កើនដល់ 90% នៅក្នុងឆ្នាំ2016។
គិតមកត្រឹមថ្ងៃទី30 ខែកញ្ញា ឆ្នាំ2019 ទ្រព្យសកម្មរបស់ធនាគារ ABA មានចំនួន 4.1 ប៊ីលានដុល្លារ។ ធនាគារផ្តល់សេវាជូនដល់អតិថិជនជាង 650,000 នាក់ តាមរយៈបណ្តាញសាខាចំនួន 70 សាខា កន្លែងស្វ័យសេវាធនាគារជាង 550 កន្លែង និងប្រព័ន្ធធនាគារអនឡាញ និងធនាគារតាមទូរស័ព្ទឈានមុខជាច្រើនទៀត៕
សម្រាប់ព័ត៌មានបន្ថែមអំពីធនាគារជាតិកាណាដា សូមចូលទៅកាន់ www.nbc.ca។
Bong I.T