គួរឲ្យស្ដាយ! ទីបំផុត សណ្ឋាគារដ៏ធំប្រចាំភ្នំពេញ «អ៊ីនធើខន» ប្រកាសបិទទ្វារថ្ងៃនេះហើយ ព្រោះតែហេតុផល…

ភ្នំពេញ៖ ប្រិយមិត្តដែលរស់នៅក្នុងក្រុងភ្នំពេញ ប្រាកដជាបានជ្រាបយ៉ាងច្បាស់ពី សណ្ឋាគារលំដាប់ផ្កាយ៥ មានឈ្មោះដើមថា « Inter- Continental Hotel» ហើយបានប្ដូរឈ្មោះមកជា «The Great Duke» បានបើកដំណើរការជាង២០ឆ្នាំមកនេះ បានប្រកាសបិទទ្វារជាបន្ទាន់ហើយ។

ក្នុងនោះដែរ កាលពីប៉ុន្មានម៉ោងមុននេះ យោងតាមសេចក្ដីជូនដំណឹងជាផ្លូវការរបស់ The Great Duke Phnom Penh បានបញ្ជាក់ថា មូលហេតុដែលបណ្ដាលឲ្យសណ្ឋាគារដ៏ធំ និងមានវ័យជាង២ទសវត្សរ៍នេះបិទទ្វារ ព្រោះតែបញ្ហាសេដ្ឋកិច្ចផ្ទាល់តែម្ដង។

លើសពីនេះ សណ្ឋារគារបានប្រកាសថា​ បុគ្គលិកទាំងអស់មិនចាំបាច់ មកធ្វើការទៀតទេ ចាប់ពីថ្ងៃ៣១ខែធ្នូ ឆ្នាំ២០១៩ តទៅ ដោយសណ្ឋារគារនឹងចាត់តាំងការិយាល័យមេធាវីមួយ ឲ្យទទួលដោះស្រាយនូវដំណើរការ នៃការបិទសណ្ឋាគារនេះ ក៏ដូចជាគិតគូដោះស្រាយពី អត្ថប្រយោជន៍របស់បុគ្គលិកទាំងអស់ តាមផ្លូវច្បាប់។

ដោយឡែក គ្រាន់តែមហាជនទាំងអស់ បានដឹងពីបញ្ហានេះភ្លាម ធ្វើឲ្យម្នាក់ៗមានចិត្តសោកស្ដាយខ្លាំងក្រៃលែង ព្រោះកន្លែងនេះហើយបានដើរតួនាទីយ៉ាងសំខាន់ ក្នុងការជួយឲ្យប្រទេសកម្ពុជាធ្វើជាម្ចាស់ផ្ទះនៃកិច្ចប្រជុំអាស៊ានជាលើកដំបូង កាលពីឆ្នាំ២០០២ ព្រមទាំងជាកន្លែងទទួលបដិសណ្ឋារកិច្ចមេដឹកនាំធំៗ ជាច្រើនផងដែរ៕