Vill Wannarot ចាប់ដៃគូជាមួយ Film Thanapat លើកដំបូងក្នុងរឿងភាគថ្មីមួយនេះ ត្រៀមចាក់បញ្ចាំងក្នុងពេលឆាប់ៗ (មានវីដេអូ)

ថៃ៖ ដូចយើងបានដឹងរួចមកហើយថា ទាំង Vill Wannarot និង Film Thanapat សុទ្ធសឹងតែជាតារាល្បីឈ្មោះប្រចាំស្ថានីយ៍ទូរទស្សន៍ថៃ ONE 31 ដែលធ្លាប់បានបង្ហាញមុខនៅក្នុងខ្សែភាពយន្តភាគថៃល្បីៗជាច្រើន។ ប៉ុន្តែតារាប្រុសស្រីទាំងពីររូបនេះ ពុំធ្លាប់មានឱកាសសម្ដែងរឿងរួមគ្នានោះហើយ ទើបអ្នកគាំទ្រជាច្រើន តែងតែប្រាថ្នាចង់ឃើញអ្នកទាំងពីរមានឱកាសសម្ដែងរឿងរួមគ្នា។ នៅទីបំផុត បំណងប្រាថ្នារបស់ហ្វេនក៏បានក្លាយមកជាការពិត ដោយសារនៅពេលនេះ ស្ថានីយ៍ទូរទស្សន៍ ថៃ ONE 31 បានត្រៀមចាក់បញ្ចាំងខ្សែភាពយន្តភាគថ្មី ដែលមានការចូលរួមសម្ដែងពីសំណាក់តារាប្រុសស្រីដ៏ល្បីទាំងពីររូបនេះ នៅលើកញ្ចក់ទូរទស្សន៍ហើយ បន្ទាប់ពីបានដំណើរការថតអស់រយៈពេលជាច្រើនខែ។

ខ្សែភាពយន្តភាគថៃមួយនេះ មានចំណងជើងថា Ruk Lek Phob ជាប្រភេទរឿងស្នេហាបែបឆ្លងភព និងមានលក្ខណៈកំប្លែងផងដែរ។ ក្នុងនោះ តួឯកប្រុសដែលសម្ដែងដោយលោក Film Thanapat ត្រូវឆ្លងភពពីសម័យទំនើប ទៅកាន់សម័យបុរាណ និងបានជួបជាមួយតួឯកស្រី ដែលសម្ដែងដោយ Vill Wannarot។ នៅពេលត្រឡប់ទៅកាន់សម័យបុរាណ តួអង្គរបស់ Film ត្រូវក្លាយខ្លួនទៅជាលោកតាទួត របស់តួអង្គ Film នៅសម័យបច្ចុប្បន្ន ដូច្នេះខ្លួនត្រូវធ្វើយ៉ាងណាឲ្យស្នេហារបស់លោកតាទួតរបស់ខ្លួន បានសម្រេចជាមួយនឹងតួអង្គរបស់ Vill។

បើតាមរយៈឈុតផ្សាយពាណិជ្ជកម្មរបស់រឿងនេះ កត់សម្គាល់ឃើញថា វាមាននូវឈុតឆាកគួរឲ្យចាប់អារម្មណ៍ កំប្លុកកំប្លែង រ៉ូមេនទិក និងរឿងរ៉ាវដ៏គួរឲ្យតាមដានជាច្រើនទៀត៕

សូមទស្សនាវីដេអូ និងរូបភាពខាងក្រោម៖