ណែមអាំងស្រួយ មិនបាច់ទិញគេ អាចធ្វើខ្លួនឯងញុំានៅផ្ទះបានយ៉ាងស្រួល

អាហារ៖ បងប្អូននៅផ្ទះ តែងតែចង់រកអាហារអ្វីដែលឆ្ងាញ់ ហើយងាយស្រួលចម្អិននឹងចំណាយលុយតិច ដូចនេះមករៀនធ្វើ ណែមអាំងស្រួយ ដែលមានរសជាតិឆ្ងាញ់ពិសេសសប្បាយធ្វើទៀតផង។ អាហារមួយនេះ មិនត្រូវការគ្រឿងផ្សំច្រើននោះទេ​ គឺសាមញ្ញបំផុត សំខាន់ឲ្យតែមាន សំបកណែម មកអាចធ្វើញុំាបានយ៉ាងឆ្ងាញ់មាត់។ 

គ្រឿងផ្សំ៖

១. សំបកណែម

២. ស្លឹកខ្ទឹម​ ស្លឹកគូឆាយ (ដាក់ក៏បានអត់ក៏បាន)

៣. ប្រហិតក្ដាម ប្រហិតហតដក

៤. ខ្ទឹមសរ​ ខ្ទឹមក្រហម

៥.​ ការ៉ុត

៦. អំបិល ស្ករស ម្រេច

៧. ប្រេងខ្យង

គ្រឿងផ្សំទាំងអស់អាចដាក់ផ្សំទៅតាម ចំណង់ចំណូលចិត្ តនិងរសជាតិដែលពេញចិត្ត ហើយគ្រឿងខ្លះអាចដាក់ក៏បាន មិនដាក់ក៏បាន ។

របៀបធ្វើ៖

១. យកចានក្រឡុកមួយដើម្បីដាក់គ្រឿង គោះពងដាក់ ដាក់គ្រឿង អំបិល ស្ករស ម្រេច ប្រេងខ្យង រួចវាយវាឲ្យសព្វ បន្ទាប់មកចិតបន្លែដែលត្រូវដាក់ដូចជា ការ៉ុតចិតជាសរសៃតូចៗ ស្លឹកខ្ទឹមនិងស្លឹកគូឆាយហាន់តូចៗ ប្រហិតក្ដាមនិងប្រហិតហតដក ហាន់ជាដុំតូចៗដាក់ចានសិន ។ 

២. ចាក់បន្លែដែលចិតរួចទាំងអស់នោះចូលក្នុងចានរួមជាមួយប្រហិតទាំងពីមុខ លាយជាមួយពង ហើយលាយវាឲ្យបែកសាច់ចូលគ្នាល្អ។ 

៣. បង្កាត់ភ្លើងយករងើកសម្រាប់អាំង ឬប្រើចង្ក្រាន្តភ្លើងក៏បានដោយបើកភ្លើងតិចៗ រួចប្រដាប់អាំងមកដាក់ហើយយកសំបកណែមមកដាក់ពីលើ រួចដួសពងលាយគ្រឿងក្នុងចាននោះដាក់ពីលើសំបកណែមស្ដើងៗ យកគំរបឆ្នាំងបិទចាំដល់វាឆ្អិនជាការស្រេច។ នៅពេល ណែមអាំងឆ្អិន វាមានរសជាតិឆ្ងុយ ចំណែកឯកសំបកណែមវិញ ស្រួយឆ្ងាញ់​៕ 

ប្រភពពី៖ Mey Sann