ស្នេហា៖ មនុស្សពីរនាក់ដែលធ្លាប់តែផ្អែមល្ហែមនឹងគ្នា គួរតែដឹងពីអត្ថន័យ នៃស្នាមថើបដែលមានចំពោះគ្នា ព្រោះថាវាក៏ជាអ្វីដែលម្នាក់ៗ ចង់បង្ហាញពីអត្ថន័យអ្វីមួយ ដើម្បីចង់ឱ្យគ្នាបានដឹងដែរ ហើយវាក៏ងាយស្រួលក្នុងការឱ្យគូស្នេហ៍ផ្តល់ក្តីស្រលាញ់ចំពោះគ្នា តាមរយៈស្នាមថើប។

ដូច្នេះហើយ ស្នាមថើបវាមិនត្រឹមតែបង្ហាញពីភាពផ្អែមល្ហែមឱ្យមនុស្សពីរនាក់ដែលស្រលាញ់គ្នាទេ តែវាបានបង្កប់នូវអត្ថន័យ ដ៏ជ្រាលជ្រៅដែលមានចំពោះគ្នាដែរ ដោយបែបនេះហើយ ទើបគូស្នេហ៍គ្រប់រូប គួរតែបានដឹងពីអត្ថន័យនៃស្នាមថើបទាំងអស់នេះ។

អត្ថន័យនៃការថើបទាំងនេះ ដែលគូស្នេហ៍គ្រប់រូបគួរតែបានដឹង៖

១. ថើបថ្ងាស

ការថើបថ្ងាស វាបញ្ជាក់ឱ្យឃើញពីទំហំនៃក្តីស្រលាញ់ ការព្រួយបារម្ភ ក៏ដូចជាការយកចិត្តទុកដាក់ និងការស្ម័គ្រចិត្តនៅតាមថែរក្សាការពារមនុស្សម្នាក់ ដែលគេបានផ្តល់ស្នាមថើបថ្ងាស់ឱ្យ។

២. ថើបថ្ពាល់

អត្ថន័យនៃការថើបថ្ពាល់ វាជាការបញ្ជាក់ពីក្តីស្រលាញ់មួយ ដែលមនុស្សម្នាក់​ ចង់ឱ្យមនុស្សម្នាក់ទៀតបានដឹងពីក្តីស្រលាញ់របស់គេ ដែលមានចំពោះតែមនុស្សម្នាក់នោះតែម្នាក់គត់។

៣. ថើបចុងច្រមុះ

រាល់ពេលមានជម្លោះរវាងគ្នា គូស្នេហ៍តែងតែថើបចុងច្រមុះគ្នា ដែលការថើបនេះ វាមានន័យថាជាការសុំទោស ដែលវាមានន័យជាងការនិយាយពាក្យសុំទោស។

៤. ថើបស្មា

អត្ថន័យនៃការថើបស្មា គឺបង្ហាញឱ្យឃើញថា គេម្នាក់នោះចង់នៅក្បែរអ្នកគ្រប់ពេលវេលា មិនថាមានអ្វីកើតឡើងទេ គេនឹងមិនបោះបង់អ្នកចោលឡើយ។

៥. ថើបដៃ

ទោះការថើបដៃ វាអាចនឹងហួសសម័យបន្តិចក៏ពិតមែន តែការថើបនេះ វាបង្ហាញឱ្យឃើញពីការយកចិត្តទុកដាក់ និង ការឱ្យតម្លៃចំពោះមនុស្សស្រីជាខ្លាំង។

៦. ថើបមាត់

អត្ថន័យនៃការថើបមាត់ បញ្ជាក់ឱ្យឃើញថា គូស្នេហ៍គឺពិតជាស្រលាញ់ដៃគូខ្លាំងណាស់ ហើយវាក៏បង្ហាញពីភាពស្និទ្ធស្នាល និងគ្មានអ្វីលាក់បាំងចំពោះគូស្នេហ៍ផងដែរ លើសពីនេះ​ ការថើបនេះ វាក៏ជាការថើបដ៏ពេញនិយមបំផុតសម្រាប់គូស្នេហ៍នៅក្នុងសម័យនេះ៕

ប្រភព៖ gangbeauty