មនុស្សស្រីឆ្លាត មិនបង្ហោះរឿងទាំងនេះលើបណ្តាញសង្គមទេ

យល់ដឹង៖ ការប្រើប្រាស់បណ្តាញសង្គមវាផ្តល់ផលល្អឬក៏ផលអាក្រក់ គឺអាស្រ័យទៅលើអ្នកប្រើប្រាស់វា​ ហើយបើបើ្រមិនត្រឹមត្រូវ គឺច្បាស់ជាផ្តល់ផលអាក្រក់ ដូច្នេះមុននឹងបង្ហោះអ្វីមួយនៅលើបណ្តាញសង្គម គួរតែមានការគិតជាមុន បើមិនអញ្ចឹងទេ ច្បាស់ជាទទួលបានផលអាក្រក់ ព្រោះបណ្តាញសង្គមវាពិតជាទូលំទូលាយ។

ហេតុនេះហើយ បានជាមនុស្សស្រីឆ្លាត គេមិនចូលចិត្តបង្ហោះរឿងទាំងនេះនៅលើបណ្តាញសង្គមឡើយ ព្រោះតែគេដឹងថាបើបង្ហោះចេញទៅ គឺច្បាស់ជាមានផលអាក្រក់ដល់ខ្លួនពួកគេជាក់ជាមិនខាន ម្យ៉ាងមនុស្សស្រីសម័យនេះ ដែលតែងតែទទួលបានផ្តល់អាក្រក់ពីបណ្តាញសង្គមនោះ គឺមកពីបង្ហោះអ្វីមួយដោយមិនបានគិតឱ្យល្អិតល្អន់។

មនុស្សស្រីឆ្លាត គេមិនបង្ហោះរឿងទាំងនេះលើបណ្តាញសង្គមទេ៖

១. រឿងផ្ទាល់ខ្លួន

មនុស្សស្រីដែលគេឆ្លាតពិត គេមិនបង្ហោះរឿងផ្ទាល់ខ្លួនរបស់គេ​ដូចជារឿងស្នេហា ឬរឿងគ្រួសារនៅលើបណ្តាញសង្គមទេ ព្រោះគេដឹងការដែលបង្ហោះបែបនេះ ដូចហែករឿងផ្ទាល់ខ្លួនឱ្យអ្នកដទៃវែកញែកអញ្ចឹង ម្យ៉ាងអ្នកដទៃគឺចាំតែសើចយំ រឿងដែលកើតមានលើជីវិតរបស់យើងតែបុ៉ណ្ណោះ ដូច្នេះមនុស្សស្រីគ្រប់រូប គួរតែរៀនទប់អារម្មណ៍ខ្លួនឯង កុំអីបន្តិច អាងតែបង្ហោះលើបណ្តាញសង្គមនោះ។

២. សម្ភារៈនិយម

វាមិនមែនជារឿងដែលខុសនោះទេ នៅពេលដែលអ្នកមានរបស់ប្រើប្រាស់ទំនើបៗ ហើយចង់បង្ហាញឱ្យគេគ្រប់គ្នាបានឃើញ ប៉ុន្តែមិនមែនមនុស្សទាំងអស់ គឺសុទ្ធតែមានបំណងល្អ ឃើញអ្នកបានល្អគេនឹងរីករាយជាមួយអ្នកនោះទេ លើសពីនេះ ការបង្ហោះអួតសម្ភារៈនិយមបែបនេះ វាក៏ជារឿងដ៏គួរឱ្យគ្រោះថ្នាក់មួយសម្រាប់មនុស្សស្រីផងដែរ។

៣. បង្ហោះរូបSexy

មិនហាមមិនឱ្យបង្ហោះរូបទេ ប៉ុន្តែវាក៏គួរតែមានព្រំដែនដែលខ្លួនអ្នកជាមនុស្សស្រីដែរ ហើយមនុស្សស្រីស្លៀកពាក់អ្វី បង្ហោះអ្វីវាជាសិទ្ធរបស់មនុស្សស្រីគ្រប់រូប ប៉ុន្តែដូចដែលដឹងស្រាប់ហើយ នៅសម័យនេះ បើអ្នកសាកតែបង្ហោះរូបភាពSexy ណាមួយ អ្នកនឹងត្រូវបានគេវាយតម្លៃយ៉ាងឆាប់រហ័ស ហេតុនេះ មនុស្សស្រីគ្រប់រូបគួរតែឆ្លាតមុននឹងបង្ហោះអ្វីមួយចូលបណ្តាញសង្គម។

៤. បង្អួតលុយកាក់

មនុស្សស្រីឆ្លាត គេមិនបង្ហោះលុយកាក់នៅលើបណ្តាញសង្គមទេ ទោះគេរកបានច្រើនប៉ុណ្ណាក៏ដោយ ព្រោះវាគ្មានសុវត្ថិភាពនៅក្នុងជីវិតពិត ដោយសារតែការបង្ហោះលុយកាក់ អាចធ្វើឱ្យមនុស្សគ្រប់គ្នាបានឃើញថាអ្នកមានលុយប៉ុណ្ណា ដែលវាងាយស្រួលខ្លាំងដល់អ្នកដែលមានបំណងអាក្រក់មកលើអ្នក ដូច្នេះហើយ បើមិនចង់នាំទុក្ខដាក់ខ្លួន មានបានប៉ុណ្ណាក៏ស្ងាត់ទៅ ល្អជាងបង្ហាញឱ្យគេឃើញ៕