ពពកនៅវៀតណាម ដូចថាសហោះឈប់ទ្រឹងលើកំពូលភ្នំ

វៀតណាម៖ ពពកចម្លែក ដែលមានរូបរាងដូចថាសហោះ ត្រូវបានប្រទះឃើញលើកំពូលភ្នំ Ba Den​ ក្នុង​ខេត្ត Tay Ninh ភាគ​អាគ្នេយ៍ នៃប្រទេសវៀតណាម កាលពីថ្ងៃព្រហស្បត្តិ៍ទី២៤ ខែវិច្ឆិកា ឆ្នាំ២០២២ម្សិលមិញនេះ។ ហើយរូបភាពទាំងប៉ុន្មាន ត្រូវបានយកទៅបង្ហោះចែកចាយ នៅលើបណ្ដាញអ៊ីនធើណេត ដោយទទួលបានការចាប់អារម្មណ៍ជាខ្លាំង។

យោងតាមសម្ដីរបស់លោក Do Vinh Quan ជាអ្នកស្រុកបានឲ្យដឹងថា គាត់បានថតរូបពពកឡើង នាវេលាម៉ោង៦:០០ព្រឹក ខណៈពេលគាត់កំពុងធ្វើដំណើរទៅធ្វើការ។ ហើយតាមពិតទៅ គាត់បានឃើញពពកផ្ដុំលើកំពូលភ្នំ តាំងពីថ្ងៃពុធទី២៣ វេលាម៉ោង៥:០០នាទីល្ងាចម៉្លេះ ប៉ុន្ដែវាមិនបានបង្ហាញរូបរាងពេញលេញដូចជាថាសហោះទេ។ ងាកទៅកាន់អ្នកស្រុកម្នាក់ទៀត គឺលោក Nguyen Dinh Quy បានបន្ថែមថា ទិដ្ឋភាពនៃពពកចម្លែកៗ តែងតែត្រូវបានប្រទះឃើញនៅអំឡុងពេលចុងឆ្នាំ និងខែភ្លៀង។

យ៉ាងណាមិញ ពពកដែលមើលទៅដូចថាសហោះកំពុងឈប់ទ្រឹងនឹងមួយកន្លែងនេះ មិនមែនជាករណីដ៏កម្រទេសម្រាប់ប្រជាជនក្នុងតំបន់ ដោយវាត្រូវបានឃើញជាញឹកញាប់ផងដែរ៕

ប្រភព: vnexpress

សូមទស្សនារូបភាពខាងក្រោម៖