ព្រលានយន្ដហោះសៀមរាប នឹងក្លាយជាកម្លាំងជំរុញភ្ញៀវទេសចរ ឲ្យមកកម្ពុជាឲ្យបានច្រើន ហើយបើកខែ១០នេះហើយ

សៀមរាប៖ នៅថ្ងៃទី១៧ ខែកក្កដា ឆ្នាំ២០២៣ យោងតាមហ្វេសប៊ុកផេកផ្លូវការ យោងតាមហ្វេសប៊ុកផេកផ្លូវការ របស់ក្រសួងព័ត៌មាន​ ឯកឧត្តម ស៊ិន ចាន់សេរីវុត្ថា អនុរដ្ឋលេខាធិការ និងជាអ្នកនាំពាក្យ នៃរដ្ឋលេខាធិការដ្ឋានអាកាសចរណ៍ស៊ីវិលបានមានប្រសាសន៍ថា៖ «តាមការគ្រោងទុកអាកាសយានដ្ឋានអន្ដរជាតិ សៀមរាបអង្គរ នឹងចាប់ផ្ដើមបើកដំណើរការនៅថ្ងៃទី១៦ ខែតុលា ឆ្នាំ២០២៣ នាពេលខាងមុខនេះ» ហើយឯកឧត្តមបានបន្ដទៀតថា នៅពេលអាកាសយានដ្ឋានដ៏ធំនេះ​​ ចាប់ដំណើរការ គេរំពឹងថា វានឹងជំរុញកំណើនសេដ្ឋកិច្ចកម្ពុជា ជាពិសេសវិស័យទេសចរណ៍ទៀតផង។

ទន្ទឹមគ្នានេះដែរ ឯកឧត្តម ស៊ិន ចាន់សេរីវុត្ថា បានឲ្យដឹងទៀតថា៖ សម្រាប់វិស័យអាកាសចរស៊ីវិល ការដឹកជញ្ជូនតាមផ្លូវអាកាស ក្នុងរយៈពេល៦ខែ ក្នុងឆ្នាំ២០២៣នេះ ប្រទេសកម្ពុជា ទទួលបានអ្នកដំណើរតាមផ្លូវអាកាស បានចំនួនជាង ២,៤៨០,០៣២នាក់ កើនឡើង២៧០ភាគរយ បើធៀបនឹងរយៈពេលដូចគ្នា ក្នុងឆ្នាំ២០២២ ​ និងទទួលបានចលនាជើងហោះហើរទ្វេទិស ចំនួន ២៤,៧២៥ កើនឡើង ១៤៨ភាគរយ ធៀបនឹងរយៈពេលដូចគ្នាក្នុងឆ្នាំ២០២២ ហើយនៅក្នុងដើមខែកក្កដា ឆ្នាំ២០២៣នេះ ប្រតិបត្តិការហោះហើរ ដឹកអ្នកដំណើរជាតិ និងអន្ដរជាតិ ជាមួយទំនិញជាមធ្យម មានចលនាហោះហើយទ្វេទិស ៨៥០ជើង ក្នុងមួយសប្ដាហ៍ពេញ និងចូលអាកាសយានដ្ឋានអន្ដរជាតិទាំង៣ ជាមួយនឹងក្រុមហ៊ុនអាកាសចរណ៍ជាតិ និងអន្ដរជាចំនួន ២៦ ដែលនឹងកំពុងតភ្ជាបប់ជើងហោះហើរឡើងវិញ ជាមួយប្រទេសអាស៊ានទាង០៩។

លើសពីនេះ ឯកឧត្តមបានមានប្រសាសន៍បន្ដទៀតថា «យើងអាចនិយាយជារួមបាន សកម្មភាពដឹកជញ្ជូ​នតាមផ្លូវអាកាសនៅកម្ពុចា បានវិលត្រលប់មកឃើញ ឬស្ដារឡើងវិញបាន៥០ភាគរយ បើប្រៀបធៀបទៅនឹងឆ្នាំ២០១៩ មុនកូវីដ១៩» មិនត្រឹមតែប៉ុណ្ណោះលោក LU Wei ប្រធានក្រុមហ៊ុន Angkor International Airport Investment (Cambodia) Co.,Ltd. (AIAI) ក៏បានបញ្ជាក់ប្រាប់ដែលថា អាកាសយាន្ដដ្ឋានថ្មីនេះ នឹងជំរុញការអភិវឌ្ឍអាកាសចរណ៍ ផ្ដល់ភាពងាយស្រួលដល់ភ្ញៀវ ដែលមកទស្សនាប្រាសាទអង្គរវត្តដ៏អស្ចារ្យ របស់កម្ពុជា ជាពិសេសទាក់ទាញដល់ភ្ញៀវទេសចរ ចិនមកកាន់ប្រទេសកម្ពុជា​ ជំរុញដល់ការអភិវដ្ឍវិស័យទេសចរណ៍ ហើយអាកាសយាន្ដដ្ឋាននេះ នឹងក្លាយជាទ្រព្យដ៏សំខាន់មួយ សម្រាប់អនាគតនៃវិស័យទេសចរណ៍ នៅកម្ពុជាផងដែរ»៕

សូមទស្សនារូបភាពខាងក្រោម៖