HyunA អន់ចិត្ត ព្រោះមិនសូវមានអ្នកមើលស្គាល់ពេលដើរចេញក្រៅ

កម្សាន្ត៖ ជាការពិតណាស់ HyunA គឺជាតារាចម្រៀងម្នាក់ដែលមានកេរ្តិ៍ឈ្មោះល្បីល្បាញក្នុងវិស័យ Kpop ក្នុងនាមជាអ្នកចម្រៀង Solo។ ហើយអ្នកដែលគាំទ្រតារាកូរ៉េទាំងអស់មិនអាចរំលងមិនស្គាល់តារាស្រីរូបនេះបានទេ ប៉ុន្ដែ រូបនាងបែរជានិយាយថា នាងមិនសូវត្រូវបានគេស្គាល់នៅខាងក្រៅទៅវិញ។

ជាមួយគ្នានេះដែរ តារាចម្រៀងស្រីរូបនេះ បានទម្លាយប្រាប់នៅក្នុងកម្មវិធីសម្ភាសន៍ជាមួយតារាប្រុស Jaejoong ឲ្យដឹងថា ខ្លួនមិនសូវត្រូវបានគេស្គាល់នោះទេ​ នៅពេលចេញក្រៅម្ដងៗ មនុស្សម្នារតែងតែដើរហួសនាង អ្នកខ្លះមិនទាំងងាកមើលនាងផង។

ដោយឡែក Jaejoong បាននិយាយថា តាមពិតអាចមកពីគេគិតថា HyunA ជាមនុស្សមានកម្ពស់ខ្ពស់ 1.70cm លោកមិននឹកស្មានដែរថា ពេលជួបនាងផ្ទាល់ រូបរាងតារាស្រីរូបនេះ តូចច្រឡឹង ខុសពីអ្វីដែលលោកធ្លាប់គិតទាំងអស់ សូម្បីតែខ្លួនក៏តូចដូចជាកូនក្មេងដែរ។

ទន្ទឹមនឹងនោះ តារាប្រុសនេះ បាននិយាយលួង HyunA ថា​ នេះអាចជាមូលហេតុដែលហ្វេនមើលនាងមិនស្គាល់ពេលនៅខាងក្រៅ ព្រោះគេតែងគិតថា រូបនាងមានកម្ពស់ខ្ពស់។ ក្រោយពេលតារាស្រីវ័យ31ឆ្នាំរូបនេះ ឮបែបនេះហើយ នាងបានធូរចិត្តវិញ ហើយនាងសូមឲ្យហ្វេនជួយគាំទ្រអាល់ប៊ុមថ្មីរបស់ខ្លួន មិនតែប៉ុណ្ណោះ​ HyunA នឹងមានវត្តមាននៅក្នុងការប្រគុំតន្ត្រីនៅប្រទេសកម្ពុជាឆាប់ៗនេះ៕

ប្រភព៖ Koreaboo