Luhan អតីតសមាជិក EXO ត្រូវគេសង្ស័យថាបានផិតក្បត់នឹងមិត្តស្រី Xiaotong

ចិន៖ ពិតណាស់ តាំងពីចែកផ្លូវគ្នាជាមួយក្រុម EXO នាឆ្នាំ២០១៤មក Luhan ក៏បានបន្តអាជីពជាតារាចម្រៀងនិងសម្ដែងនៅក្នុងប្រទេសចិន ដែលជាទឹកដីកំណើត។ អតីតសមាជិក EXO រូបនេះក៏បានមានទំនាក់ទំនងស្នេហាជាមួយនឹងកញ្ញា Guan Xiaotong ដែលជាតារាសម្ដែងម្នាក់ផងដែរ ប៉ុន្តែថ្មីៗស្រាប់តែមានពាក្យចចាមអារ៉ាមថា រូបគេបានផិតក្បត់នាង។

នាថ្ងៃទី២៧ខែកុម្ភៈកន្លងទៅ សារព័ត៌មាន Chinese Daily បានចុះផ្សាយថា Luhan គឺជាតារាចម្រៀងប្រុសដែលត្រូវអ្នកតាមដានតារាឈ្មោះ "Chiguoshaojiexiaohan' (吃瓜少女?小寒)" បានលើកយកមកនិយាយថា មានតារាប្រុសនៅចិនម្នាក់មានជីវិតផ្ទាល់ខ្លួនដ៏ខិលខូចបំផុត គឺលួចមាននារីក្រោយខ្នងមិត្តស្រី។

អ្នកតាមដានតារាម្នាក់នេះ ក៏បានបញ្ជាក់ទៀតថា តារាម្នាក់នេះគឺជាតារាប្រុស មានអ្នកតាមដាននៅលើ Weibo លើសពី៥០លាននាក់ និងធ្លាប់ចូលរួមសម្ដែងទាំងរឿងភាគខ្នាតវែង ខ្សែភាពយន្ត និងមានការប្រគុំតន្ត្រីទៀតផង ដែលវាត្រូវនឹង Luhan មានអ្នកតាមដានក្នុង Weibo ជាង ៦៣.១៩លាន។ ភ្លាមៗបន្ទាប់ពីនេះមានអ្នកតាមដានតារាម្នាក់ទៀត បានបញ្ជាក់ថាការអះអាងនេះគឺជាការពិត។

Luhan ដែលក្លាយជាបុគ្គលដែលគេសង្ស័យនេះ បានទាក់ទង Xiaotong តាំងពីឆ្នាំ២០១៧។ យ៉ាងណាមិញ ព័ត៌មាននេះគ្រាន់តែជាព័ត៌មានចចាមអារ៉ាម ពុំទាន់មានភ្នាក់ងាររបស់គេចេញមុខមកបកស្រាយអ្វីឡើយ៕  

ប្រភព៖ allkpop