ទីបំផុត Jin វិលត្រឡប់ពីបំពេញកាតព្វកិច្ចយោធាហើយ ខណៈសមាជិក BTS ចាំស្វាគមន៍

កូរ៉េខាងត្បូង៖ នាថ្ងៃទី១២ខែមិថុនាមុននេះបន្តិច Jin ដែលជាសមាជិករបស់ក្រុមចម្រៀងបុរស BTS ដ៏ល្បីល្បាញ បានបញ្ចប់កាតព្វកិច្ចបម្រើយោធាជាផ្លូវការ និងបានវិលត្រឡប់មកវិញហើយ។

Jin បានបំពេញកាតព្វកិច្ចយោធាអស់រយៈពេល១៨ខែ ដោយអ្នកគាំទ្របានប្រទះឃើញរូបគេបានដើរចេញមកក្នុងឯកសណ្ឋានយោធា ជាមួយនឹងទឹកមុខពោរពេញដោយស្នាមញញិម ហើយអ្វីដែលកាន់តែពិសេសនោះ សមាជិក BTS ផ្សេងទៀតដូចជា J-Hope , RM, Jimin , V និង Jungkook ក៏សុទ្ធតែបង្ហាញវត្តមានមកអបអរសមាជិកបងធំរូបនេះដែរ។

ក្នុងនោះ J-Hope បានប្រគល់ផ្កាមួយបាច់ទៅឲ្យ Jin ហើយ RM ក៏បានលេងសាក់សូហ្វូន (Saxophone) ដើម្បីបង្ហាញពីជំនាញផ្នែកតន្ត្រីទៀតផង ស្របពេលសមាជិកទាំងអស់ដែលនៅជាប់បំពេញកាតព្វកិច្ចយោធានោះបានសុំច្បាប់សម្រាក១ថ្ងៃ ដើម្បីអបអរដល់ Jin។ ក្នុងនោះដែរ សកម្មភាពដំបូងរបស់ Jin បន្ទាប់ពីចាកចេញពីកាតព្វកិច្ចយោធាគឺនឹងមានកម្មវិធីចួបជុំអ្នកគាំទ្រ និងអាល់ប៊ុមទោលពិសេសទៀតផង។

យ៉ាងណាមិញ នាខែតុលាខាងមុខនេះ សមាជិក J-Hope ក៏នឹងបញ្ចប់ការបំពេញកាតព្វកិច្ចយោធាតាមពីក្រោយ Jin ផងដែរ ហើយនាឆ្នាំ២០២៥ គឺសមាជិកទាំងអស់របស់ BTS អាចនឹងបានចួបជុំគ្នាវិញហើយ៕  

ប្រភព៖ korean-vibe