វឌ្ឍនភាពគម្រោងសាងសង់ទំនប់និងជីកព្រែក នៅកំពង់ធំ-សៀមរាប សម្រេច១០០% ខណៈ ឧត្តរមានជ័យបាន៧០%

កំពង់ធំ-សៀមរាប-ឧត្តរមានជ័យ៖ វឌ្ឍនភាពការងារសាងសង់ ជួសជុលទំនប់ និងគម្រោងជីកព្រែក ក្នុងភូមិសាស្ត្រខេត្តកំពង់ធំ ខេត្តសៀមរាប និងខេត្តឧត្តរមានជ័យ សម្រេចបាន១០០% និង៧០%។ បើតាម លោក ប៊ុន ហ៊ាន រដ្ឋលេខាធិការ ចុះពិនិត្យវឌ្ឍនភាព។

លោក ប៊ុន ហ៊ាន រដ្ឋលេខាធិការ និងជាប្រធានអង្គភាពត្រួតពិនិត្យគម្រោង ដោយទទួលបានការអនុញ្ញាត ពីរដ្ឋមន្ត្រីក្រសួងធនធានទឹក និងឧតុនិយម បានដឹកនាំក្រុមការងាររបស់អង្គភាព សហការជាមួយមន្ត្រីបច្ចេកទេសនាយកដ្ឋានវិស្វកម្ម ចុះពិនិត្យវឌ្ឍនភាពគម្រោងក្នុងខេត្តកំពង់ធំ ខេត្តសៀមរាប និងខេត្តឧត្តរមានជ័យ នៅថ្ងៃទី៣០-៣១ ខែតុលា ឆ្នាំ២០២៤។

ក្នុងឱកាសនោះ រដ្ឋលេខាធិការ បានផ្តាំផ្ញើដល់ក្រុមការងារអនុវត្តគម្រោងរបស់នាយកដ្ឋានវិស្វកម្ម និងសហគមន៍កសិករប្រើប្រាស់ទឹក ត្រូវយកចិត្តទុកដាក់លើការងារគ្រប់គ្រង និងប្រើប្រាស់សមិទ្ធផលថ្មីនេះឱ្យបានត្រឹមត្រូវតាមលក្ខណៈបច្ចេកទេស។

 លោក ក៏បានណែនាំដល់មន្ទីរធនធានទឹក និងឧតុនិយម គ្រប់គ្រងសមិទ្ធផលទាំងនេះឱ្យមានសុវត្ថិភាព និងប្រើប្រាស់ឱ្យបានត្រឹមត្រូវ ជាពិសេសជំរុញសហគមន៍កសិករប្រើប្រាស់ទឹក និងអាជ្ញាធរដែនដី ចុះផ្សព្វផ្សាយការប្រើប្រាស់ប្រព័ន្ធធារាសាស្ត្រនេះឱ្យមាននិរន្តរភាព សម្រាប់ការងារស្រោចស្រព និងការប្រើប្រាស់ប្រចាំថ្ងៃជូនប្រជាពលរដ្ឋបានយូរអង្វែង។

រដ្ឋលេខាធិការ និងក្រុមការងារបានអញ្ជើញចុះពិនិត្យវឌ្ឍនភាពការងារដូចជា៖

ទី១-គម្រោងសាងសង់ទំនប់អាងទឹកពាម ក្នុងខេត្តកំពង់ធំ ដែលរួមមានការសាងសង់ទំនប់អាងទឹកពាមចំនួន ១ខ្សែ ប្រវែង ២០០០ម៉ែត្រ សាងសង់សំណង់បង្ហៀរចំនួន ១កន្លែង និងសំណង់ទ្វារទឹកចំនួន ១កន្លែង ជាលទ្ធផលការងារសម្រេចបាន ១០០%។

គម្រោងនេះ គឺដើម្បីស្ទាក់ទឹកស្ទឹងស្ទោង ដែលហូរចូលនៅរដូវវស្សាមកស្តុកទុកក្នុងទំនប់អាងទឹកដែលបានជួសជុលរួច សម្រាប់ធ្វើការស្រោចស្រពបន្ថែមលើផ្ទៃដីបង្កបង្កើនផលកសិកម្មស្រូវរដូវវស្សាចំនួន ៦២៦ហិកតា ស្រូវរដូវប្រាំងលើកទី១ ចំនួន ១ ៩៤៩ហិកតា ស្រូវរដូវប្រាំងលើកទី២ ចំនួន ១ ៩៤៩ហិកតា និងដំណាំរួមផ្សំផ្សេងៗចំនួន ១៥ហិកតា ជូនប្រជាពលរដ្ឋប្រមាណ ២ ៤២៦គ្រួសារ ក្នុងភូមិចំនួន១១ នៃឃុំម្សាក្រង ដែលនៅផ្នែកខាងក្រោមទំនប់តាមរយៈសំណង់បង្ហៀរ និងសំណង់ទ្វារបញ្ចេញទឹក។

ទី២-គម្រោងជីកព្រែកបង្វែរចរន្តទិសទឹក ក្នុងខេត្តសៀមរាប ដែលរួមមានការជីកព្រែកបង្វែរចរន្តទិសទឹកប្រវែង ៤៥០ម៉ែត្រ សាងសង់ទំនប់បង្វែរចរន្តទិសទឹកស្ទឹងស្រែងប្រវែង ១២០ម៉ែត្រ ជើងទេរទំនប់នេះផ្នែកខាងលើ(upstream)ជាជើងទេរបេតុងប្រវែង ៨០ម៉ែត្រ ជាលទ្ធផលការងារសម្រេចបាន ១០០%។

គម្រោងនេះ គឺដើម្បីតម្រង់ដងស្ទឹងស្រែងកុំឱ្យហូរបុកដាច់ច្រាំងស្ទឹងដែលជាភ្លឺប្រឡាយមេប្រព័ន្ធធារាសាស្ត្រស្ទឹងស្រែង(ជំហាន១)។ តាមដងព្រែកបង្វែរចរន្តទិសទឹកនេះជួយដោះស្រាយទឹកសម្រាប់ស្រោចស្រពបន្ថែមលើផ្ទៃដីបង្កបង្កើនផលដំណាំកសិកម្មស្រូវវស្សាចំនួន ១ ៣៧៥ហិកតា ស្រូវប្រាំងលើកទី១ ចំនួន ១៣៥ហិកតា ស្រូវប្រាំងលើកទី២ ចំនួន ១៣៥ហិកតា និងដំណាំរួមផ្សំចំនួន ២០ហិកតា ជូនប្រជាពលរដ្ឋចំនួន ១៤៩០គ្រួសារ ក្នុងភូមិចំនួន៦ នៃឃុំស្លែងស្ពាន ស្រុកស្រីស្នំ ធានាដល់ការប្រើប្រាស់ប្រចាំថ្ងៃ និងជាទំនប់រក្សា និងការពារធនធានធម្មជាតិក្នុងមូលដ្ឋាន។

ទី៣-គម្រោងជួសជុលទំនប់អាងទឹកស្រែល្អ ក្នុងខេត្តឧត្តរមានជ័យ ដែលរួមមាន ការជួសជុលទំនប់ដីចំនួន ១ខ្សែប្រវែង ៣ ២០០ម៉ែត្រ សាងសង់សំណង់សិល្បការ្យថ្មីចំនួន ៦កន្លែង ជាលទ្ធផលការងារសម្រេចបានប្រមាណ ៧០%។

គម្រោងនេះ គឺដើម្បីបង្កើនបរិមាណស្តុកទឹក ដែលហូរធ្លាក់ពីអូរមេម៉ាយ មួយផ្នែកទៀតមកពីផ្នែកខាងលើនៃស្ទឹងសែន និងផ្ទៃរងទឹកភ្លៀងក្នុងតំបន់ មកស្តុកទុកក្នុងអាងទឹកស្រែល្អ សម្រាប់ធានាដល់ការប្រើប្រាស់ប្រចាំថ្ងៃ ការងារស្រោចស្រពបន្ថែមលើផ្ទៃដីបង្កបង្កើនផលកសិកម្មស្រូវវស្សាចំនួន ១ ៩៩៧ហិកតា ស្រូវរដូវប្រាំងចំនួន ៥៩០ហិកតា និងដំណាំរួមផ្សំផ្សេងៗទៀតចំនួន ៦៩ហិកតា ជូនប្រជាពលរដ្ឋប្រមាណចំនួន ៦៥៨គ្រួសារ ក្នុងភូមិចំនួន៨ នៃឃុំបាក់អន្លូង និងឃុំត្រពាំងប្រាសាទ ស្រុកត្រពាំងប្រាសាទ ខេត្តឧត្តរមានជ័យ៕

ដោយ៖ មឿន ឌីណា (Moeun Dyna)