Adele បង្ហាញអារម្មណ៍ បែបនេះ ទៅកាន់អ្នកគាំទ្រ និងគូដណ្ដឹង ដោយសារ ...

កម្សាន្ត៖ តារាចម្រៀងស្រី Adele បានស្រក់ទឹកភ្នែក អំឡុងពេលសុន្ទរកថាលា ទៅកាន់អ្នកគាំទ្រ និងការដឹងគុណចំពោះគូដណ្តឹង និងកូនប្រុសរបស់នាង ក្នុងការសម្តែងចុងក្រោយនៃស៊េរីការប្រគុំតន្ត្រី 'Weekends With Adele' នៅថ្ងៃទី ២៣ ខែវិច្ឆិកា។

តារាចម្រៀងស្រីវ័យ ៣៦ ឆ្នាំរូបនេះ បានចែករំលែកថា «ខ្ញុំនឹកអ្នកខ្លាំងណាស់ ខ្ញុំមិនដឹងថាពេលណា ខ្ញុំនឹងសម្តែងម្តងទៀតទេ ខ្ញុំមិនមានគម្រោងអ្វីទេ ប៉ុន្តែជាការពិតខ្ញុំនឹងត្រលប់មកវិញ។ រឿងតែមួយគត់ដែលខ្ញុំល្អ គឺការច្រៀងចម្រៀងនិងតន្ត្រី» ។

មិនត្រឹមតែប៉ុណ្ណោះ តារាស្រីរូបនេះ ក៏បានងាកទៅកូនប្រុសអាយុ ១៤ ឆ្នាំរបស់នាង Angelo ដោយបានសារភាពថា «ខ្ញុំបានជ្រើសរើសធ្វើការស្នាក់នៅ (ជំនួសឱ្យការធ្វើដំណើរ) ដើម្បីនៅជាមួយកូនប្រុសរបស់ខ្ញុំដើម្បីជួយគាត់ឱ្យមានជីវិតធម្មតា ហើយឥឡូវនេះខ្ញុំអាចនៅជាមួយគាត់ពេលចុងសប្តាហ៍បានហើយ ព្រោះច្បាស់ណាស់ថា គាត់មិនអាចតែងតែទៅ Las Vegas បានទេ។ ខ្ញុំស្រលាញ់អ្នកខ្លាំងណាស់ អរគុណសម្រាប់ការអត់ធ្មត់ជាមួយខ្ញុំ»។

ជាពិសេស Adele ក៏បានអរគុណដល់គូដណ្តឹង Rich Paul ដែលតែងតែគាំទ្រដល់នាង នៅក្បែរនាង ពេលមានអារម្មណ៍នឿយហត់។ Adele ក៏បានរត់ចុះមករកទស្សនិកជន ហើយថើ.ប Rich Paul និងកូនប្រុសវ័យជំទង់របស់នាង ចំពេលមានការទះដៃអបអរសាទរពីទស្សនិកជន ផងដែរ៕

ប្រភព៖ Ngoisao.net

សូមទស្សនារូបភាពខាងក្រោម៖