កាន់តែក្តៅហើយ! លោកគ្រូអេ ភូថង បានផ្ញើសារផ្តាំទៅ Mortaza ថាបើចង់ជួបធឿន ធារ៉ា គឺជួបបាន តែសុំដាក់លក្ខខណ្ឌបែបនេះ បើធ្វើមិនបាន ត្រូវបង់លុយ ១ពាន់ដុល្លារ

ប្រដាល់៖ រឿងរ៉ាវរបស់អ្នកប្រដាល់សញ្ជាតិ អ៊ីរ៉ង់ Mortaza កំពុងតែឡើងកម្តៅខ្លាំងជាបន្តបន្ទាប់ ជាពិសេសបន្ទាប់ពីរូបគេបានយកឈ្នះលើអ្នកប្រដាល់ជើងខ្លាំងរបស់ កម្ពុជា កីឡាករធន់ រិទ្ធី ដោយផ្តួលឱ្យសន្លប់ត្រឹមទឹកទី ១ នៅសង្វៀនហង្សមាស កាលពីថ្ងៃ សៅរិ៍ ទី ៧ ថ្មីៗនេះ។

យ៉ាងណាមិញ បន្ទាប់ពីអ្នកប្រដាល់ អ៊ីរ៉ង់ រូបនេះ ដណ្តើមបានខ្សែក្រវាត់ X-Treme Kun Khmer ពីធន់ រិទ្ធី បានសម្រេច ស្រាប់តែរូបគេបានប្រកាសក្តែងៗ ថាចង់ជួបជាមួយអ្នកប្រដាល់កំពូលរបស់ កម្ពុជា កីឡាករធឿន ធារ៉ា ហើយមិនត្រឹមតែប៉ុណ្ណោះ ប្រូម៉ូតទ័ររបស់រូបគេ គឺលោក Midhun Jith ក៏បានបោះសម្តីបញ្ឈឺជាបន្តបន្ទាប់មកកាន់កីឡាករកម្ពុជាផងដែរ ដោយលោកបានលើកឡើងថា «នៅក្នុងប្រទេសកម្ពុជា គឺគ្មានអ្នកប្រដាល់ខ្មែរណាអាចបំបាក់ Mortaza បានឡើយ»។

ដោយសារតែពាក្យទាំងអស់នេះហើយ ទើបធ្វើឱ្យលោកគ្រូ អេ ភូថង ដែលជាគ្រូបង្វឹកផ្ទាល់របស់ធឿន ធារ៉ា ហាក់មិនសប្បាយចិត្តនឹងរឿងនេះនោះទេ ហើយថ្មីៗនេះនៅក្នុងកិច្ចសម្ភាសន៍ជាមួយអេដមីន រ៉ែនដូ Kun Khmer Fighter លោកបានមានប្រសាសន៍ឆ្លើយតបទៅ Mortaza វិញថា «បើរូបគេចង់ជួបជាមួយ ធារ៉ា គឺជួបបាន ប៉ុន្តែត្រូវវាយក្នុងទម្ងន់ ៧២.៥ គីឡូក្រាម យ៉ាងច្រើនដល់ ៧៣ គីឡូក្រាមគត់ តែបើធ្វើមិនបានទេ គឺត្រូវបង់លុយពិន័យចំនួន ១ ពាន់ដុល្លារអាមេរិក»។

គួរបញ្ជាក់ថា Mortaza គេជាប្រភេទកីឡាករគីឡូធ្ងន់ ហើយក្នុងការប្រកួតនៅប្រទេសកម្ពុជាកន្លងមក រូបគេគឺមិនដែលចុះមកវាយដល់ទម្ងន់ ៧២ ឬ ៧៣ គីឡូក្រាមនោះទេ ខណៈការប្រកួតជាមួយធន់ រិទ្ធី កន្លងទៅ គឺរូបគេវាយដល់ទម្ងន់ ៧៦.៥ គីឡូក្រាមឯណោះ៕