ល្អអីល្អយ៉ាងនេះ! Amad Diallo យប់មិញឆ្កឹះផុតអ្នកចាំទីស៊ុតមួយគ្រាប់អ៊េមហួស ជួយឱ្យ Man UTD វាយបកយកឈ្នះ Man City ២-១(មានវីដេអូ)

បរទេស៖ នាយប់ថ្ងៃទី ១៦ ខែ ធ្នូ ឆ្នាំ ២០២៤ ម្សិលមិញនេះ ក្រុម Manchester City បានបើកទ្វាកីឡដ្ឋាន Etihad Stadium របស់ខ្លួន ទទួលស្វាគមន៍ក្រុមភ្ញៀវ Manchester United នៅក្នុងការប្រកួតសប្តាហ៍ទី ១៦ នៃក្របខណ្ឌ Premier League របស់ អង់គ្លេស។

ជាការពិតណាស់ នៅក្នុងការប្រកួតរវាងក្រុមខ្លាំងប្រចាំទីក្រុង Manchester City ទាំងពីរខាងលើគឺពិតជាតានតឹងមែនទែន ប៉ុន្តែចុងក្រោយខាងក្រុមភ្ញៀវ Man UTD ហាក់ធ្វើបានល្អជាង ដោយបញ្ចប់ការប្រកួត ៩០ នាទីពេញ ពួកគេបានយកឈ្នះលើក្រុមមេឃខៀវ Man City ក្នុងលទ្ធផល ២ ទល់នឹង ១។

ក្នុងនោះខាងក្រុម Man City ជាអ្នករកគ្រាប់បាល់នាំមុខបានមុន ដែលស៊ុតបញ្ចូលទីដោយខ្សែការពារ Josko Gvardiol នៅនាទីទី ៣៦ លុះរំលងឈានចូលដល់ចុងវគ្គទី ២ ខាងក្រុម Man UTD ក៏រកគ្រាប់បាល់វាយបកបាន ២ គ្រាប់មកវិញ ដែលស៊ុតបញ្ចូលទីដោយ Bruno Fernandes នៅនាទីទី ៨៨ (P) និង Amad Diallo នៅនាទីទី ៩០។

គួរបញ្ជាក់ថា Man UTD បច្ចុប្បន្នកំពុងឈរនៅលេខរៀងទី ១៣ នៃតារាងចំណាត់ថ្នាក់របស់ Premier League ក្រោយឆ្លងកាត់ ១៦ ប្រកួតកន្លងមក ពួកគេឈ្នះ ៦ ស្មើ ៤ និងចាញ់ ៦ មាន ២២ ពិន្ទុ ចំណែកក្រុម Man City វិញ កំពុងឈរនៅលេខរៀងទី ៥ ក្រោយឆ្លងកាត់ ១៦ ប្រកួតដូចគ្នា ពួកគេមាន ២៧ ពិន្ទុក្នុងដៃ។

សូមទស្សនាវីដេអូខាងក្រោម៖