Song Joong Ki និយាយសរសើរ ភរិយា បែបនេះ ក្រោយ រៀបការជិត ២ ឆ្នាំ

កម្សាន្ត៖ តារា​សម្ដែងប្រុស លោក Song Joong Ki បាន​ចេញមកសរសើរ ចំពោះភរិយា​ ដែលជាអតីត​តារា​សម្ដែង​អង់គ្លេស Katy Louise Saunders ពី​រឿង​ដ៏​អស្ចារ្យ​ដែល​នាង​បាន​នាំ​មក​ជូន​ លោក និង​ក្រុម​គ្រួសារ។

ក្នុង​វគ្គ​ទី ២៦ ខែ​ធ្នូ​ នៅលើ YouTube កម្មវិធី Hello, This Is Choi Hwa Jeong ដែលតារា​សម្ដែង Song Joong Ki បាន​បង្ហាញ​ខ្លួន​ជា​ភ្ញៀវ បានជជែកជាមួយពិធីករ តារារូបនេះ ក៏បានចែករំលែកយ៉ាងច្រើនអំពីប្រពន្ធរបស់ខ្លួន ដោយបាននិយាយថា «ប្រពន្ធនិងកូនរបស់ខ្ញុំនៅអ៊ីតាលី ដូច្នេះនៅពេលដែលយើងមិនមានការថត យើងស្នាក់នៅប្រទេសអ៊ីតាលី។ កូនរបស់យើងនិយាយភាសាអ៊ីតាលី ហើយមានពេលខ្លះ ដែលខ្ញុំមិនយល់ពីអ្វីដែលពួកគេនិយាយ។ រឿងដែលដាក់សម្ពាធលើខ្ញុំ ដូច្នេះ ខ្ញុំចាប់ផ្តើមរៀនភាសាអ៊ីតាលី ប្រពន្ធរបស់ខ្ញុំក៏កំពុងរៀនភាសាកូរ៉េ ហើយជំនាញភាសារបស់នាងពិតជាអស្ចារ្យណាស់ នាងថែមទាំងបាននិយាយទៅកាន់ម្តាយរបស់ខ្ញុំថា ម៉ាក់ ញ៉ាំ ។ ទោះបីជានាងនិយាយមិនបានល្អឥតខ្ចោះក៏ដោយ តែគួរឲ្យស្រលាញ់ណាស់មែនទេ?»។

តារាប្រុសរូបនេះ ថែមទាំងបានបន្តទៀតថា «គ្រប់គ្នាដឹងពីរបៀបដែលជនជាតិកូរ៉េឱ្យតម្លៃលើសុជីវធម៌ ប៉ុន្តែប្រពន្ធខ្ញុំរឹតតែតឹងរ៉ឹងចំពោះសីលធម៌ និងការគោរព។ ខ្ញុំពិតជា ត្រូវប្រពន្ធខ្ញុំ ស្តីបន្ទោសខ្លាំងណាស់។ មានពេលមួយ អ្នកគ្រប់គ្រងរបស់ខ្ញុំកំពុងរង់ចាំខ្ញុំ ហើយបន្ទាប់ពី គាត់ចាកចេញ ប្រពន្ធរបស់ខ្ញុំបាននិយាយថា 'តើអ្នកគិតថាអ្នកជាអ្នកណា បានជាឱ្យអ្នកផ្សេងទៀតរង់ចាំដូច្នេះ?'»។

យ៉ាងណាមិញ តារាប្រុសរូបនេះ ក៏បានបន្ថែមថា មនុស្សដែលស្គាល់ពួកគេ ច្រើនតែនិយាយថា ប្រពន្ធរបស់លោក គឺល្អជាងលោកគ្រប់ផ្នែក។ ហើយតារាប្រុសរូបនេះ ក៏បាននិយាយថា នាងគឺល្អពេកសម្រាប់រូបលោក ផងដែរ៕

ប្រភព៖ Ngoisao.net

សូមទស្សនារូបភាពខាងក្រោម៖