បរទេស៖ អតីតអ្នកចាត់ការ Real Madrid លោក Zinedine Zidane ធ្លាប់បានលើកសរសើរពីអតីតកូនក្រុមរបស់ខ្លួនម្នាក់ ថាគេគឺមានជើងឆ្វេងល្អដូចជាកំពូលខ្សែប្រយុទ្ធ Lionel Messi។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
ជាការពិតណាស់ លោក Zidane ដែលបច្ចុប្បន្នមានវ័យ ៥២ ឆ្នាំ គឺត្រូវបានគេរាប់ថា ជាវីរបុរសមួយរូបរបស់ Real Madrid តាំងពីនៅជាកីឡាករ រហូតដល់ជាគ្រូបង្វឹក ខណៈក្នុងអាជីពរបស់លោក ដែលបានដឹកនាំក្រុមអធិរាជស២លើកពីឆ្នាំ ២០១៦-២០១៨ និង ២០១៩-២០២១ លោកបានឆ្លងកាត់ការបង្វឹកកីឡាករកំពូលៗជាច្រើនដូចជា Cristiano Ronaldo, Gareth Bale, Karim Benzema, Luka Modric, Toni Kroos និងកីឡាករជាច្រើនទៀត ប៉ុន្តែរឿងមួយដែលភ្ញាក់ផ្អើល លោកគឺធ្លាប់បានសរសើរ Marco Asensio ចំៗ ថាគេគឺមានជើងឆ្វេងល្អដូចជាអតីតខ្សែប្រយុទ្ធ Barcelona កីឡាករ Leo Messi។
ទាក់ទងនឹងរឿងខាងលើ Asensio ដែលបច្ចុប្បន្នកំពុងលេងនៅ Paris Saint-Germain បាននិយាយកាលពីឆ្នាំ ២០១៧ យ៉ាងដូច្នេះថា៖
Zidane បានប្រាប់ខ្ញុំ ថាក្រៅពី Messi គាត់មិនដែលបានឃើញនរណាមានជើងឆ្វេងដូចជារបស់ខ្ញុំឡើយ។ ខ្ញុំហាក់មានការចាប់អារម្មណ៍បន្តិច ដោយសារតែ Messi គឺជាចំណែកមួយនៃកីឡាករបាល់ទាត់៕
ប្រភព៖ Sportbible
Bong I.T