ភ្នំពេញ៖ ក្នុងឆ្នាំ២០២៤ ទុនវិនិយោគសរុបនៅកម្ពុជាមានចំនួនជាង ២០ ៤៥៦.៦លានដុល្លារ បានកើនចំនួន ១ ៨៩០.២លានដុល្លារ ឬស្មើនឹង ១០.១៨% បើធៀបទៅនឹងឆ្នាំ២០២៣។ បើតាមរបាយការណ៍ស្តីពីលទ្ធផលការងារឆ្នាំ២០២៤និងទិសដៅការងារឆ្នាំ២០២៥ នៃក្រសួងឧស្សាហកម្ម វិទ្យាសាស្ត្រ បច្ចេកវិទ្យានិងនវានុវត្តន៍។
ទុនវិនិយោគប្រចាំឆ្នាំ២០២៤ ក្នុងនេះ ទុនវិនិយោគក្នុងស្រុកមានចំនួន ៣ ៩៦១.៧លានដុល្លារស្មើនឹង ១៩.៣៧% នៃទុនវិនិយោគសរុប និងប្រភពវិនិយោគក្នុង និងក្រៅស្រុកសរុបមានចំនួន ៣២ប្រភព មានការកើនឡើងចំនួន ២ប្រភព ស្មើនឹង ៦.៦៧% បើធៀបទៅនឹងឆ្នាំ២០២៣។
ក្នុងឆ្នាំ២០២៤ កន្លងមក រោងចក្រធុនធំ បានដំណើរការមានចំនួន ២ ៤២៥រោងចក្រ ក្នុងនោះ រោងចក្រធុនធំកើតថ្មីមានចំនួន ៣២៦រោងចក្រ ខណៈ រោងចក្រចំនួន ២៦បានបិទទ្វារ។ ជាមួយនឹងរោងចក្រធុនធំជាង ២ពាន់នេះ បានស្រូបកម្លាំងពលកម្មសរុបចំនួន ១ ១៦០ ១៨១នាក់ (ស្រីចំនួន ៨៥៤,៨១៩ នាក់) មានការកើនឡើងចំនួន ១១៩ ៨៤៨ នាក់ ស្មើនឹង ១១.៥២% បើធៀបទៅនឹងឆ្នាំ២០២៣។
ក្នុងឆ្នាំ២០២៤ កម្ពុជាមានតំបន់សេដ្ឋកិច្ចពិសេស មានរោងចក្រដំណើរការចំនួន ៣០តំបន់ ស្ថិតនៅក្នុង ១២រាជធានីខេត្ត ។ ចំនួននេះ មានការកើនឡើងចំនួន ៤តំបន់ ស្មើនឹង ១៥.៣% បើធៀបទៅនឹងឆ្នាំ២០២៣ ខណៈ សួនឧស្សាហកម្មមានរោងចក្រដំណើរការសរុបចំនួន ២០សួន ស្ថិតនៅក្នុង ៥រាជធានីខេត្ត កើនចំនួន ៣សួន ស្មើនឹង ១៧.៦៥% បើធៀបនឹងឆ្នាំ២០២៣។
គួរបញ្ជាក់ថា ក្រសួងឧស្សាហកម្ម វិទ្យាសាស្ត្រ បច្ចេកវិទ្យានិងនវានុវត្តន៍ កំពុងអនុវត្តយ៉ាងមធ្យ័តនូវគោលនយោបាយអភិវឌ្ឍន៍វិស័យឧស្សាហកម្មកម្ពុជាឆ្នាំ២០១៥-២០២៥ និងយុទ្ធសាស្ត្របញ្ចកោណ ដំណាក់កាលទី១ បានដាក់គោលដៅសំខាន់លើការបានខិតខំពង្រឹង និងបង្កើនកម្លាំង ធនធាន ដោយផ្តោតការយកចិត្តទុកដាក់លើការងារគ្រប់គ្រងរោងចក្រ ការងារបច្ចេកទេស និងសុវត្ថិភាពឧស្សាហកម្ម ការងារកម្មសិទ្ធិឧស្សាហកម្ម និងការងារជំរុញចលនាផលិតភាព៕
ដោយ៖ មឿន ឌីណា (Moeun Dyna)
Bong I.T