មុនប៉ះ Arsenal លោក Enrique ថាកូនក្រុមលោករូបនេះ ជាខ្សែបម្រើល្អបំផុតក្នុងលោក

កីឡា៖ លោក Luis Enrique ជាអ្នកចាត់ការរបស់ក្រុមសេដ្ឋីបារាំង Paris Saint-Germain បាននិយាយថា កីឡាករ Vitinha ជាខ្សែបម្រើដ៏ល្អផ្ដាច់គេក្នុងលោក មុនពេលការប្រកួតវគ្គពាក់កណ្ដាលផ្ដាច់ព្រ័ត្រពានរង្វាន់ Champions League ទល់នឹង Arsenal មកដល់។

PSG នឹងត្រូវប៉ះភាគីរបស់លោក Mikel Arteta នាថ្ងៃទី៣០ខែមេសា សម្រាប់ជើងទី១ ហើយជើងទី២នឹងធ្វើឡើងនាថ្ងៃទី៨ខែឧសភា ខណៈដែល PSG ជាក្រុមដែលគេរំពឹងទុកថាអាចឈានដល់វគ្គផ្ដាច់ព្រ័ត្រ Champions League សម្រាប់រដូវកាល ២០២៤-២០២៥ នេះ។

Vitinha បានក្លាយជាកីឡាករស្នូលនៅតំបន់បម្រើនៅ PSG តាំងពីលោក Luis Enrique ចូលមកដឹកនាំនាឆ្នាំ២០២៣ ដោយរូបគេបានចូលលេងយ៉ាងទៀងទាត់ក្នុងក្រុមនិងរំពឹងទុកថានឹងធ្វើដំណើរជាមួយ PSG ទៅប្រកួតជាមួយ Arsenal នៅ UCL ផងដែរ។

យ៉ាងណាមិញ លោក Enrique បានសរសើរកូនក្រុមរបស់លោករូបនេះថា៖

"ខ្ញុំមិនឃើញកីឡាករណាល្អដូចគេសម្រាប់តំណែជាខ្សែបម្រើទេ។ ខ្ញុំអាចនឹងគិតខុស តែខ្ញុំកម្រគិតខុសណាស់។"  

ប្រភព៖ metro