សប្បាយក្លាយជាទុកហើយ! Sterling កំពុងភ័យខ្លួនក្រោយជប់លៀងជាមួយ Usain Bolt ដែលទើបធ្វើតេស្តឃើញមានផ្ទុកកូវីដ១៩

បរទេស៖​ ខ្សែប្រយុទ្ធឆ្នើមរបស់ក្លិប Manchester City កីឡាករ Raheem Sterling ត្រូវបានគេមើលឃើញថាបានចូលរួមក្នុងពិធីជប់លៀងខួបកំណើតលើកទី៣៤ឆ្នាំរបស់កំពូលអ្នករត់ប្រណាំង Usain Bolt នៅក្នុងប្រទេសចាមៃកាកាលពីថ្ងៃសុក្រសប្តាហ៍មុន។ 

អ្វីដែលគួរឲ្យសោកស្តាយនោះគឺថាថ្មីៗនេះកីឡាករ Usain Bolt បានធ្វើតេស្តឃើញមានផ្ទុកមេរោគនៃជំងឺកូវីដ១៩។ ជាក់ស្តែងនៅក្នុងវីដេអូនៃការជប់លៀងនោះ ឃើញថាមានការរាំរែកជិតៗគ្នា ដោយមិនបានពាក់ម៉ាស់និងរក្សាគំលាតសុវត្ថិភាពនោះទេ។ យ៉ាងណាមិញភ្នាក់ងាររបស់កីឡាករ Sterling បានបញ្ជាក់ថានៅពេលនេះរូបគេមិនមានអាការៈណាមួយពាក់ព័ន្ធនឹងជំងឺកូវីដ១៩នោះទេ ប៉ុន្តែក្រុមគ្រូពេទ្យកំពុងតែឃ្លាំមើលពីសុខភាពរបស់គេយ៉ាងចិត្តទុកដាក់។

គួរឲ្យដឹងដែរថានៅថ្ងៃនេះគ្រូបង្វឹកជម្រើសជាតិអង់គ្លេសលោក Gareth Southgate នឹងត្រូវចុចឈ្មោះកីឡាករទាំង២៥នាក់ដើម្បីទៅលេងក្នុងពានរង្វាន់ UEFA Nations League 2020 នៅខែក្រោយនេះ។ ក្នុងនោះដើម្បីអាចចូលលេងឲ្យក្រុមជម្រើសជាតិអង់គ្លេសក្នុងព្រឹត្តិការណ៍នោះបាន Sterling ត្រូវឆ្លងកាត់ការធ្វើតេស្តឲ្យប្រាកដមួយថារូបគេគ្មានផ្ទុកជំងឺកូវីដ១៩៕​

ប្រភព៖ thesun