អនាគតផែនដីទៅជាយ៉ាងណា! នេះជា ៧ទីតាំង ដែលជាកន្លែងបំពុលទឹកកខ្វក់ខ្លាំងបំផុតនៅលើផែនដី

ការបំពុលទឹក ភាគច្រើនមិនមែនជាការកើតឡើងដោយធម្មជាតិនោះឡើយ តែវាបណ្តាលមកពីសកម្មភាពមួយ ជាពិសេសគឺសកម្មភាពមនុស្សតែម្តង ដែលធ្វើឱ្យប្រភព​ទឹក​ដូច​ជា សមុទ្រ ទន្លេ ស្ទឹង បឹងបួ​ ព្រែក ប្រែក្លាយជាកខ្វក់ គ្មាន​អនាម័យ ប្រសិនជាគ្មានការតាមដាន ត្រួតពិនិត្យ និងកែលម្អឡើងវិញទាន់ពេលវេលា។ ដោយការបំពុលទឹក អាចបំផ្លាញដល់អាយុជីវិតមនុស្ស សត្វ និងរុក្ខជាតិ ដែល​រស់នៅ​ក្នុង​ទន្លេ ស្ទឹង បឹងបួ ឬ សមុទ្រ គួរឱ្យខ្លាច ហើយក្នុងនោះ មានតំបន់ខ្លះថែមទាំងបានជាប់ឈ្មោះថាជាកន្លែងបំពុលទឹកខ្លាំងបំផុតនៅលើផែនដីគួរឱ្យភ្ញាក់ផ្អើល។

តោះ មកស្គាល់ ៧ទីតាំង ដែលជាកន្លែងបំពុលទឹកកខ្វក់ខ្លាំងបំផុតនៅលើផែនដីដូចខាងក្រោមនេះ ៖

១. ទីក្រុង Guatemala ប្រទេស Guatemala

ទីក្រុង Guatemala ត្រូវគេស្គាល់ថាជាទីក្រុងដែលមានប្រព័ន្ធទឹកកខ្វក់បំពុលបរិយាកាសខ្លាំងបំផុត ដោយប្រជាជននៅក្នុងក្រុងទាំងអស់សុទ្ធតែបាននាំគ្នាមកប្រើប្រាស់ទឹកនេះ មិនថាតែមកបោកគក់សំលៀកបំពាក់ ដងទឹកប្រើប្រាស់ លាងសម្ភារៈប្រើប្រាស់ រួមទាំងការមករើសកាកសំណល់អេតចាយផងដែរ។

២.​ ​ទីក្រុង Wuhan ប្រទេសចិន

ប្រទេសចិនត្រូវបានគេស្គាល់ថាជាប្រទេសដែលមានឧស្សាហកម្មមមាញឹក និងបំពុលបរិយាកាសខ្លាំងបំផុត តែនៅក្នុងនោះទីក្រុងវ៉ូហាន ប្រទេសចិនក៏ត្រូវគេដឹងថាជាតំបន់ដែលមានប្រភពទឹកកខ្វក់បំពុលបរិយាកាសខ្លាំងដូចគ្នា។ គ្រាន់តែផ្នែកមួយនៃជីវភាពអ្នករស់នៅលើសមុទ្រក៏ដឹងថាវាកខ្វក់បែបណាទៅហើយ។

៣.​ ឈូងសមុទ្រ Davao ប្រទេសហ្វីលីពីន

ឈូងសមុទ្រ Davao ប្រទេសហ្វីលីពីន ក៏ត្រូវបានគេស្គាល់ថាជាទីកន្លែងដែលមានការបំពុលទឹកខ្លាំងបំផុតដែរ តាមរយៈការចោលសម្រាម ជាពិសេសគឺកាកសំណល់ថង់ផ្លាស្ទិកតែម្តង។ គ្រាន់តែក្រឡេកមកមើលសាកសពត្រីបាឡែនដែលស្លាប់​ អ្នកក៏អាចមើលដឹងដែរថា តើមានកាកសំណល់ច្រើនបែបណាបន្សល់នៅក្នុងដែនសមុទ្រមួយនេះ។

៤. ឆ្នេរសមុទ្រ Mallipo ប្រទេសកូរ៉េខាងត្បូង

ឆ្នេរសមុទ្រ Mallipo បានក្លាយជាកន្លែងបំពុលទឹកខ្លាំងមួយនៅក្នុងប្រទេសកូរ៉េខាងត្បូង ដោយសារតែឧបទ្ទវហេតុកំពប់ប្រេងនៅលើដែនសមុទ្រនេះ។ ដោយក្នុងមួយថ្ងៃៗមានកម្មករជាច្រើន ក៏បាននឹងកំពុងតែធ្វើការសម្អាតប្រេងនេះជារៀងរាល់ថ្ងៃដើម្បីសម្អាតដែនឆ្នេរសមុទ្រនេះផងដែរ។

៥. ភូមិ Kolontar ប្រទេសហុងគ្រី

ភូមិ Kolontar ត្រូវបានគេដឹងថាជាតំបន់មួយដែលមានការបំពុលទឹកខ្លាំងបំផុតមួយ ស្ថិតនៅក្នុងប្រទេសហុងគ្រី ដោយសារតែភក់ និងជ្រាំជាច្រើនបានកកើតឡើងនៅក្នុងតំបន់នោះ។ ក្នុងមួយថ្ងៃៗមានកម្មករសហគមន៍ជាច្រើននាក់ បានស្លៀកពាក់ និងពាក់ឧបករណ៍ ធ្វើការសម្អាតភក់ជ្រាំដែលបានប្រមូលម្តុំនៅក្នុងប្រភពទឹកទាំងនេះផងដែរ។  

៦. ទីក្រុង Mumbai ប្រទេសឥណ្ឌា

ទីក្រុង Mumbai ប្រទេសឥណ្ឌា គឺជាតំបន់ដែលមានប្រជាជនកុះករច្រើនរស់នៅអ៊ូអរប្រជុំគ្នា តែក៏ជាតំបន់ដែលសម្បូរទៅដោយកាកសំណល់ផងដែរ​​​ ជាពិសេសគឺកាកសំណល់សម្រាមជាច្រើនបានបន្សល់ទៅលើប្រភពទឹក ប្រែក្លាយជាការបំពុលទឹកខ្លាំងបំផុតមួយទៀតផង។

៧. ទីក្រុង Wenzhou ប្រទេសចិន

ដូចដែលយើងបានដឹងរួចហើយថា ប្រទេសចិនគឺជាប្រភពបំពុលបរិយកាសផែនដីខ្លាំងបំផុត ដោយនៅក្នុងទីក្រុង Wenzhou ប្រទេសចិន​ គឺជាទីតាំងមួយកន្លែងទៀតហើយដែលបំពុលទឹកខ្លាំងបំផុត។ មើលតែប្រភពទឹកពណ៌ក្រហមមួយនៅក្នុងទីក្រុងនេះទៅក៏អ្នកអាចដឹងបានដែរថា តើទឹកនេះប្រមូលផ្តុំភាពកខ្វក់បែបណាទៅបានជាប្រែពណ៌ដល់ថ្នាក់នេះនោះ៕

ចុះប្រិយមិត្តយល់យ៉ាងណាដែរ?