អស្ចារ្យណាស់! ភ្នំពេញក្រោន លត់ បឹងកេត ៥-០ ក្លាយជាម្ចាស់ពានលីគកំពូលកម្ពុជានៅរដូវកាលនេះ

កម្ពុជា៖ ក្រុមសិង្ហក្រហមភ្នំពេញក្រោន បានក្លាយជាម្ចាស់ជើងឯកលីគកំពូលកម្ពុជា Cambodian Premier League នៅរដូវកាល ២០២២ នេះជាផ្លូវការ បន្ទាប់ពីយកឈ្នះក្រុមគូប្រជែង បឹងកេត នៅទឹកដី RSN Stadium។

នាល្ងាចថ្ងៃទី ០៣ ខែ ធ្នូ ឆ្នាំ ២០២២ នេះក្រុម ភ្នំពេញក្រោន ពិតជាធ្វើបានល្អមែនទែន ដោយពួកគេទទួលជ័យជម្នះទៅលើក្រុម បឹងកេត ក្នុងលទ្ធផល ៥ ទល់នឹង ០, ដោយឡែកវិសាខា បានទទួលជ័យជម្នះទៅលើក្រុម ស្វាយរៀង ១-០។

ខណៈលទ្ធផលនេះបានធ្វើឱ្យ ភ្នំពេញក្រោន មាន ៥២ ពិន្ទុឈរនៅលេខរៀងទី ១ មានពិន្ទុស្មើគ្នាជាមួយ វិសាខា ដែលឈរនៅលេខរៀងទី ២ ប៉ុន្តែក្រុមរហស្សនាមសិង្ហក្រហមមានគ្រាប់បាល់ចំណេញច្រើនជាង និងមានពិន្ទុលើសស្វាយរៀងចំនួន ៣ ពិន្ទុដែលឈរនៅលេខរៀងទី ៣។

គួរបញ្ជាក់ថា នេះជាលើកទី ៨ ហើយនៅក្នុងប្រវត្តិសាស្ត្ររបស់ភ្នំពេញក្រោន ដែលពួកគេក្លាយជាម្ចាស់ពានលីគកំពូលកម្ពុជា៕