គ្មានថ្ងៃជួបស្នេហ៍ពិតទេ បើនៅតែលេងចរិតបែបនេះ

ស្នេហា៖ ស្នេហាពិត វាមិនចេះតែអាចកើតមានចំពោះមនុស្សគ្រប់គ្នាបាននោះទេ វារមែងតែកើតឡើងចំពោះមនុស្សដែលស័ក្កសមនឹងបានជួបវា ព្រោះថាការដែលអាចមានសំណាងបានជួបស្នេហាពិត វាក៏កើតចេញពីអត្តចរិត និងសកម្មភាពប្រចាំថ្ងៃរបស់មនុស្សគ្រប់គ្នាផងដែរ។

ដូច្នេះហើយ អ្នករាល់គ្នាត្រូវដឹងថា អ្នកនឹងគ្មានថ្ងៃបានជួបស្នេហាពិតប្រាកដដូចគេបានឡើយ ប្រសិនបើអ្នកនៅតែលេងចរិត ដូចដែលបានរៀបរាប់នៅខាងក្រោមនេះទៀត ព្រោះថាមនុស្សដែលលេងចរិតបែបនេះ គ្មានអ្នកណាចង់ស្រលាញ់និងនៅក្បែរបានយូរនោះទេ។

គ្មានថ្ងៃជួបស្នេហ៍ពិតទេ បើនៅតែលេងចរិតបែបនេះ៖

១. ចង់បាន តែមិនចេះផ្តល់ឱ្យ

ជាការពិតណាស់ អ្នកនឹងគ្មានថ្ងៃបានជួបស្នេហាពិតសមដូចបំណងឡើយ ប្រសិនជាអ្នកជាមនុស្សម្នាក់ ដែលតែងតែចង់បានពីគេ​ តែអ្នកខ្លួនឯងបែរជាមិនចេះផ្តល់ឱ្យគេវិញនោះ ដូច្នេះហើយ វាមិនចម្លែកទេ ដែលរាល់មនុស្សដែលចូលមកស្រលាញ់អ្នក គេនៅមិនបានយូរ ព្រោះគ្មានអ្នកណាទ្រាំនៅស្រលាញ់មនុស្សអាត្មានិយមបែបនេះឡើយ។

២. ចូលចិត្តគិតច្រើន

ស្នេហាពិត ជាស្នេហាដែលកើតចេញពីក្តីស្រលាញ់ និងការដែលចេះមានភាពជឿជាក់លើគ្នាទៅវិញទៅមក តែបើរាល់ពេលដែលមានស្នេហាម្តងៗ អ្នកចូលចិត្តគិតច្រើន សង្ស័យចំពោះគេច្រើន និងចាត់ទុកគេដូចជាជនសង្ស័យនោះ អ្នកនឹងគ្មានថ្ងៃទទួលបានស្នេហាពិតពីគេឡើយ ព្រោះគ្មានអ្នកណាអាចទ្រាំនៅជាមួយចរិតបែបនេះទេ។

៣. ធ្វើខ្លួនដូចព្រះនាង

នៅក្នុងរឿងស្នេហា ប្រសិនបើគេចាត់ទុកអ្នកដូចជាព្រះនាង អ្នកនឹងមានសំណាងក្នុងរឿងស្នេហា តែបើអ្នកចាត់ទុកខ្លួនឯងជាព្រះនាងវិញ អ្នកនឹងមិនមានសំណាងក្នុងរឿងស្នេហាឡើយ ព្រោះថានៅពេលដែលអ្នកចាត់ទុកខ្លួនឯងជាព្រះនាង អ្នកតែងតែចង់ឱ្យគេតាមលួង តាមទ្រអ្នកគ្រប់ពេល ដែលជាហេតុធ្វើឱ្យមនុស្សដែលចូលមកស្រលាញ់អ្នកនៅមិនបានយូរ។

៤. ចូលចិត្តគ្រប់គ្រងលើគេ

អ្នករាល់គ្នាត្រូវដឹងថា គ្មានអ្នកណាចង់ឱ្យជីវិតខ្លួនឯងត្រូវបានគេគ្រប់គ្រងលើនោះទេ អញ្ចឹងហើយ ប្រសិនបើអ្នកមិនចង់ឱ្យខ្លួនឯង គ្មានឱកាសក្នុងការទទួលបានស្នេហាពិតទេនោះ រាលល់ពេលដែលមានស្នេហាម្តងៗ អ្នកគួរតែកុំប្រើចរិតដែលចូលចិត្តគ្រប់គ្រងលើជីវិតរបស់គេឱ្យសោះ បើទោះបីជាអ្នកស្រលាញ់គេខ្លាំងយ៉ាងណាក៏ដោយ៕