អាមេរិក៖ Taylor Swift គឺជាតារាចម្រៀងផបដ៏ល្បីល្បាញ មិនត្រឹមតែនៅអាមេរិកទេ គឺនៅទូទាំងពិភពលោកតែម្ដង ដោយក្នុងនោះការប្រគុំតន្ត្រី "The Eras Tour" របស់នាងបានទទួលសន្ទុះនៃការគាំទ្រភ្លូកទឹកភ្លូកដី និងរកចំណូលបានរាប់លាន។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
យ៉ាងណាមិញ ភាពជោគជ័យរបស់ Taylor មិនមែនបានមកពីសំណាងនោះឡើយ គឺបានមកពីភាពអត់ធ្មត់និងខិតខំប្រឹងប្រែងរបស់នាង មិនថាធ្លាប់ឆ្លងកាត់រឿងរ៉ាវពិបាកប៉ុណ្ណាក៏ដោយ។ ជាក់ស្ដែងកាលពីឆ្នាំ២០១៦ កន្លងទៅ Taylor ត្រូវបានមហាជនជាច្រើនចោទប្រកាន់ថានាងជាមនុស្សពុតក្បត់ មនុស្សកុហក ជា "ពស់" ដែលលាក់ពិស បន្ទាប់ពីមានជម្លោះជាមួយ តារារ៉េបល្បីល្បាញ "Kanye West" ។
កាលណោះ Kanye បានចេញបទចម្រៀងថ្មីមានឈ្មោះថា "Famous" ដែលក្នុងនោះប៉ារ៉ូលបទចម្រៀងមួយឃ្លាបានប្រើប្រាស់ពាក្យមិនសមរម្យទៅលើ Taylor Swift ។ បន្ទាប់មក Taylor បានចេញមុខមកប្រតិកម្ម ដោយអះអាងថានាងពុំបានអនុញ្ញាតឲ្យ Kanye យកឈ្មោះនាងទៅប្រើក្នុងភាសាបែបនោះទេ។ ស្រាប់តែ Kim Kardashian ដែលកាលណោះជាភរិយារបស់ Kanye បានបង្ហោះសន្ទនាតាមទូរស័ព្ទក្លែងក្លាយ (កាត់ត) រវាង Taylor និង Kanye ចោទថា Taylor បានយល់ព្រមឲ្យ Kanye ប្រើប្រាស់ឃ្លានោះក្នុងបទចម្រៀងរបស់គេទៅវិញ ដែលបានធ្វើឲ្យមហាជនគិតថា Taylor Swift ជាមនុស្សនិយាយកុហក ហើយបាននាំគ្នាចូលទៅនិយាយពាក្យមិនសមរម្យដាក់នាងក្នុងបណ្ដាញសង្គមដោយបានដាក់រូបពស់ទៀតផង។
ឥឡូវនេះក្រោយជាប់ជា "មនុស្សដ៏អស្ចារ្យបំផុតប្រចាំឆ្នាំ២០២៣" ពីទស្សនាវដ្ដី TIME រួចមក Taylor បានទម្លាយថា ជម្លោះជាមួយ Kanye និង Kim ធ្វើឲ្យនាងពិបាកចិត្តរហូតផ្លាស់ប្ដូរទីលំនៅ៖
មិនបានធ្វើអីខុសសោះ អាជីពទាំងមូលក៏បានឃ្លាតឆ្ងាយពីខ្ញុំ។ ខ្ញុំត្រូវគេចោទប្រកាន់ ដែលកាលណោះ Kim Kardashian បានថតសំឡេងខ្ញុំដោយខុសច្បាប់ហើយយកទៅកាត់ត និងប្រាប់គ្រប់គ្នាថាខ្ញុំជាមនុស្សកុហក។ បន្ទាប់មក វាក៏បានធ្វើឲ្យខ្ញុំចួបនឹងជីវិតដែលខ្ញុំមិនធ្លាប់ចួបប្រទះពីមុន។ ខ្ញុំបានប្ដូរទីលំនៅទៅប្រទេសផ្សេង ហើយមិនចាកចេញពីផ្ទះដែលជួលនោះអស់រយៈពេលមួយឆ្នាំឯណោះ។ ខ្ញុំខ្លាចសូម្បីទទួលទូរស័ព្ទ។ ខ្ញុំបានរុញច្រានមនុស្សជាច្រើនចេញពីជីវិតដោយសារតែមិនជឿទុកចិត្តលើពួកគេ។ ខ្ញុំពិតជាពិបាកចិត្តខ្លាំងណាស់។
ប្រភព៖ people
Bong I.T